Lo que
abundaba d’aquella yeren les tiendes de comestibles, les tiendines de
“Ultramarinos” que se dicía y onde lo mismo se mercaba un kilo arroz, o de
fideos, que una cinta pa un adornu de un vestíu, que dos pesetes “de lo que
fiede” que yera la colonia a granel que teníen en unos garrafones de cristal
mui aparente, con un grifu piquiñín pa dar les medíes en los frasquinos que
llevaben los veceros, o unos botones pa unos pantalones o un peine pa ponete
guapu enantes de dir a buscar a la moza.
Como en
casa teníemos tienda, nosotros nun visitábemos muncho les de la competencia,
pero solo en la nuestra cai, Julian Rodríguez y la Cai d’abaxu, Antonio
Rodríguez, asitiábense les de Socorro, la de Nieves, la de Nides y la nuestra
en Julian Rodríguez y les de Santos, la de Mercedes, la de Olimpia, la de
Manuela y la de
Amparo en Antonio Rodríguez.
Nosotros,
los del Nido, teníamos una relación un poco especial con los de Olimpia y
Pachu, que teníen ocho fíos y empataben con nosotros a guah.es, yera como si
ente los dos comercios tuvieren una competición a ver cual axuntaba más neños.
Un llabor de les tiendes
Un
llabor de les tiendes que se perdió y que muncho ayudó n’aquellos tiempos a
tantísima xente, yeren les llibretes, coles que se mercaba “a lo fiao”. Los
veceros de cada tienda teníen una llibreta na que se diba apuntando lo que
gastaben a lo llargo de la selmana o del mes, según cobraren el sueldu y al
final del plazu, facíase la cuenta y pagaben lo que hubieren consumío. Pero nun
siempre yera asina, a veces, nel mes
dábense gastos que se salíen de lo común, una enfermedá o dalgún compromisu
familiar, una boda, un bautizu y lluego, cuando cobraben, nun yos alcanzaba pa saldar
la delda, entós llegaben a la tienda y contaben lo sucedío y diben liquidando
el pufu a pocos y a pocos nos meses siguientes.
Esto
yera lo normal. Pero pasaba delles veces que en algunos casos nun yera la
tiesta lo que meyor funcionaba y tirábense a comprar más coses de les que la
economía aconseyaba, nesos casos el tenderu o la tendera facía el papel del
conseyeru espiritual y financieru: Oi, fulana, paezme qu’esti mes tas
pasándote, nun debíes llevar esto o aquello, que nun lo necesites y lluego nun
te va a llegar pa terminar el mes. Estes conversaciones y otres paecíes,
téngoles sentío milenta veces en casa y na mayoría les ocasiones surtíen
efeutu.
Too se sabía
Los tenderos yeren sabeores de la situación de les families y esi conocimiento que tenía el comerciante de los sus vecinos, del sueldu que
ganaben, de la formalidá pa facer frente a los compromisos, del sentío común
que gastaben, facía que funcionaren casi como banqueros o cases d’empréstitu o
asesores financieros.
Estos
servicios furrulaben bien nes dos direiciones, por un llau a les families permitíayos salvar situaciones d’apuru y pol
otru criaba un llazu ente’l cliente y el comerciante, al que quedaba agradecíu
porque y salvara aquel momento d’apuru. Y ye que la vida, n’aquellos tiempos
d’escasez, diba p’alante gracies a la solidaridá ente los probes, cosa que
n’estos tiempos de grandes superficies y comercios multinacionales, ni se sueña
que pudiere esistir.
Agora,
coles tarxetes de créitu, dase una situación paecía, permítente mercar en un
intre nel que tas sin perres, pero nunca tendrán la función del conseyeru.
Cuando dalgún se pasa nes compres, nun va topar la voz sensata que-y diga “onde
vas mercando eso que nun precises pa na, déxate de bobáes que puedes pasar en sin ello y nun vas facer más que metete en
xareos”. Y asina se dan los casos que se dan, que cuando se dan cuenta
tienen un follón nel Xuzgao, que delles veces arréglase solo cola perda de la
vivienda o con cualquier otru traspiés gordu asemeyáu.
© Milio´l del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu