El sereno

De la que yéramos neños, nel barrio había sereno, apenes m’alcuerdo del primeru que conocí, yera un paisanu mayor que me paez que malapenes podía col chuzu que arrastraba, pero cuando se retiró aquel home, entró nel puestu Arnaldo, un mozallón del Abedul, en Belmonte Miranda, un pueblu altu al que pa llegar a él, habíen fecho una carreteruca que daba miéu polos vericuetos polos que se empolingaba, con unos despeñaeros de munchu cuidáu.

 Arnaldo yera muy bona persona, servicial y atentu, pero gustába-y el vino y cuando s’enfilaba un poco, había que tener cuidao con él, porque-y gustaba imponer l’autoridá, bueno pámeque lo que-y gustaba yera engarrase, así que cuando volvíes pal barrio un poco tarde, al tornar d’alguna romería o algo asina, teníes que tener cuidao, porque si lu topabes un poco caliente, igual te solmenaba un par de chuzazos si nun espabilabes.

Cuando abrí el Nido en Coronel Bobes, ya habíen quitao el cuerpu de serenos y Arnaldo taba recolocáu nel serviciu de limpieza, un día taba tomando un vasu nel chigre y coincidió que tenía arimau a la barra el muñecu del Mateín, el personax que dende aquella ye’l emblema de les fiestes uvieínes, habíenlu fecho entre la mi hermana Mary, Hugo O’Donnel y Ánxel Nava, ficiérayos el encargu la SOF y habíenme tomao a mí pa tomar les medíes del traxe, que encargaron en Almacenes Silka, por cierto que costó un trunfu poné-y el traxe al muñecón, nun ye lo mismo vestir a un paisano, que pué doblar los brazos y retorcese, que vestir a un muñecu tiesu. El casu ye que cuando terminaron el muñecu, enantes de llevalu a la SOF, baxáronlu al Nido y colocáronlu al pie de la barra, llevaba un cachu allí mangáu cuando Arnaldo, que taba na otra punta de la barra, vuélvese pa mí y dizme tou seriu, Oye Milio, aquel paisano d’ellí enfrente nun me quita güeyu d’enriba y ya me ta calentando, ¡si quier bronca va a tenela!

Home, Arnaldo, ¿pero nun ves que ye un muñecu?

Arnaldo, asombráu fue pa onde’l muñecu y quería invitalu a vino a toa costa, como Mateín nun bebía, mangó-y u pitu na boca y hubo que dir buscar una máquina de fotos, que de aquella nun había móviles que ficieren selfis, pa inmortalizar el alcuentru de Mateín con Arnaldo, dende entós grandes amigos.

© Milio´l del Nido

Memories d´unos nenos de Ciudá Naranco