Negocios

¡Ah! Una cosa que se nos escapaba. La Ciudá Naranco yera barrio de puxu industrial. Na Casa Verde, xunto a La Cárcel,  taba la fábrica de la Mayonesa Yelma, de fama en toa Asturies. ¿Qué pensábeis, que yera un barrio cualquiera? Teníamos hasta fábrica de mayonesa ¡na menos!

Tamien teníamos nel barrio una empresa de trasportes de altor: “Rey Soler” que taba enfrente de la Centralilla de Hidrollétrica y al llao del Prao de les Oveyines, que facía esquina entre les cais Aniceto Rodríguez y lo que agora llamen Lorenzo Abruñedo, que pa nosotros yera La Cuestina. En Rey Soler teníen media docena de camiones que me paez que yeren decomisaos de los rusos que habíen mandao p’acá cuando la Guerra Civil. El Prao les Oveyines, yera más pequeñu qu’el Prao Villar y valíanos pa xugar cuando yéramos pocos, porque prestaba más que un prao grande pa xugar solo seis u ocho.

El taller de Manolo Carreras

Otru negociu que había nel barrio yera el taller mecánicu de Manolo Carreras, que taba na Cai Manuel Rodríguez. Entonces nun había munchos coches y Manolo entamara a trabayar como mecánicu na Renault de Abundio Gascón, pero independizóse aína. Manolo y Celia teníen tres fíos, Manoli, Mario y la neña, que agora nun m’alcuerdo como se llamaba. Manoli deseguía entamó a trabayar col Pa y yeren los dos muy bonos mecánicos, con munchu prestixu, pero Manoli tuvo malísima suerte y una Selmana Santa que marchó a pescar a Villah.ormes, nun accidente desgraciáu cayó pa la mar y esmuciose. Fue el primer muertu na pandilla de amigos y dexonos a toos cavilgando, pola primer vez, no precario de la vida, porque hasta aquella, les muertes que conociéremos yeren de xente mayor, que ya yos tocaba y polo tanto, nun nos impresionaben como la de Manoli, unu como nosotros, pero que dexaba un furacu definitivu ente les files de la reciella.

Españoles, Franco ha muerto

Años dempués pasome un casu con Manolo que esclaria un poco como yera la vida no que yera la diztadura de Franco. El día en que morrió el caudillo, cuando ente llárimes nos contó Arias Navarro aquel famosu “Españoles, Franco, ha muerto”, por eses coses que pasen, a media mañana apetecióseme tomar un vermú, pienso que pa rumiar la noticia. Allegueme al Mesón del Pinchu, que abriera diba poco y pedíi a Merce, la chigrera, el vermú. Yeren sobre les once y media la mañana y nel bar solo taba Manolo Carreras con un vasu de pinta delantre, colo que paecía un vino blanco. Cuando pedí el vermú, echome una güeyada y fízo-y una seña a Merce que, sin mediar pallabra, púnxome otru vasu de pinta, sacó una botella de xampán que tenía dientro la nevera y sirviome una dosis, diciéndome que taba invitáu por Manolo, que seguía sentau na otra punta de la barra, díi les gracies con un xestu, tomamos la bébora sin dicir pallabra y colamos ca un pal su ablugu. Hasta agora, xamás comentamos na de na. Claro que nun facía falta  ninguna explicar nada.

El Buri

Había también dellos talleres, como el de Antonio, el “Buri”, no que llamábemos la Colonia Astur, El Buri, trabayaba el fierro y tenía el taller bien cerque del almacén de güevos de Atilano San Pedro . El taller yera un tendeyón vieyu nel que nun aparaben de sonar los martiellazos, allí debíen trabayar cuatro o seis paisanos y yera sitiu bien importante pa los guah.es, porque allí, de vez en cuando, podíen echate una mano pa facer un aro o pa conseguir unes ruedes de cojinete pa facer un carro bolines o un patinete . 

Los güevos de Atilano

Atilano San Pedro debía ser el mayorista de güevos más importante d’Asturies y contábase por casa de cuando fizo un anunciu na radio nel que dicíen que “Pa güevos grandes y gordos los de Atilano San Pedro”. Pámeque duró un día l’anunciu, ¿Qué raro, he? La familia de Atilano yeren gallegos que se habíen istaláo n’Uviéu vinientes de la parte de San Ciprian en Lugo, y de aquella parte traíen los güevos, que n’aquellos tiempos nun veníen de granxes, si no que los diben axuntando nes tiendines de los pueblos que yeren corresponsales d’Atilano, porque tol mundo tenía en casa pites, pero nun tenía perres y así, pa pagar na tienda lo poco que en ella mercaben, sal, café y zucre, yera lo más corriente el trueque, pagaben colos güevos que dos o tres díes a la selmana recoyía el camión d’Atilano. 

Esti asuntu conocémoslu bien porque, a veces, díbamos nel camión a visitar la familia al pueblu, a Serantes y Villamil, en Tapia, pa lo que salíamos col camión que llevaba Gabriel, a les cinco la mañana y dexábanos en pueblo sobre les ocho la nueche, después de haber parao por toles tiendes del recorríu. D’aquella l’occidente asturianu yera de verdá el Llonxanu Oeste.

Don Manuel, el de la Farmacia

Don Manuel Estrada, el farmacéuticu, yera un tipo bastante especial. Cuando abrió la farmacia en la Cai Julián Rodríguez esquina a Aniceto Rodríguez, en la terracina de delante, téngolu visto saltar un bancu de carpinteru de Enrique el Teresu, que tenía la carpintería en baxo la terraza, ya sabéis que les cais Ricardo Montes y Torrecerredo, nomáes cola nomenclatura aztual, tienen planos distintos y lo que ye fachada por Torrecerredo ye suétanu por Ricardo Montes. Pues Don Manuel, altu y flacu como yera, saltaba’l bancu con un cartel de la crema Nivea colocáu enriba, con una carrera que nun pasaría de los cuatro metros y que, en casu de fallar el saltu, metíase’l trompazu escontra la maera del bancu, que nun yera ninguna cintina de tela. El saltu pienso que debía pasar del metro cuarenta. En zapatos de suela, sin carrera, el suelu de cemento y detrás, como a metro y mediu, el muru que zarraba la terraza. Pues sin despeinase, con zapatinos y de traxe. Fuera la chaqueta y a saltar, neñu. De xuro que con aquelles condiciones naturales, en estos tiempos, Don Manuel hubiere sio un atleta de categoría, pero los tiempos yeren lo que yeren…

Jerónimo, el de les indiciones

Na farmacia de Don Manuel, trabayaba de mancebu, Jerónimo el prazticante. Jerónimo yera piquiñín, piquiñín, Carlinos Corrales, El Besugu, que medía como dos centímetros más que’l mancebu, dicía que yera tan pequeñu porque taba gastáu de andar de una casa pa otra poniendo indiciones tol tiempu. D’alguna manera, Jerónimo habíase convertío en Xefe de obres del fosu atléticu y un poco el entrenador, non solo de Poladura, tamién  de toos los guah.es que saltábamos cuando nun entrenaba  Pola.  

De toles maneres lo que lu llevó a la cumal de la fama fue cuando ganó la carrera bicis sin cadena, que organizaba tolos años Don Manuel Estrada, el farmacéuticu, poles fiestes d’Económicos. La carrera consistía en baxar la Cai Fray Ceferino, onde taben pa un llau el “Loyolín” y enfrente el periódicu Región y onde editaben también La Hoja del Lunes, cruzar La Farola de General Elorza, que taba delante’l Sanatorio Girón y por onde pasaba la carretera xeneral y llegar lo más cerque que se podía del Hospital Militar. Facía falta munchu pesu dicíen y a mí paecíame que facien falta tamién munchos coyones pa dexase baxar por aquelles cais de tierra en sin asfalcar, sin tocar los frenos pa garrar inercia y subir la cuestina hacia’l Hospital. Jerónimo, el sin frenos y a lo lloco.

Los zapateros

Nel barrio había dellos tallerucos de zapateru y nun me digais porqué, toos ellos yeren centru reunión pa los rapazos, que nun teníemos ni perres ni llugares más aparentes pa xuntanos. Les zapateríes facíen un poco el llabor de los aztuales Centros Sociales. El de zapateru,  col de reloxeru y dalgún otru, yera un de los oficios que deprendíen los que teníen dalguna minusvalía que yos torgaba pa furrular en otros trabayos. Ya enantes vos falamos de Paco el Cabezu, que el probe nun yera completu del too. Aparte taben Pin el Zapa y el Puchi, coxos los dos. 

Pin el Zapa yera del Naranco, paezme que de la Peña’l Fuelle, que ye el pueblín que queda al llau de la Fonte Los Pastores, penriba de San Miguel de Lliñu. Pin acoxaba muncho de les dos pates y amás debía tener dalgo na coluna. El probe, pa caminar, cimblaba que yera un tormentu velu. Baxaba y subía tolos díes pa La Cuesta con aquel andar suyu y poles mañanes tovía yera quien, pero poles tardes daba noxu velu. Pin dába-y al vino con afición desaxerada y subía pa casa con unes moñes impresionantes. Pero ye de resaltar cómo, a pesar de les dificultáes que tenía pa movese y el viciu que tenía col vino, gustaba-y la montaña y los domingos marchaba d’escursión pa los Picos d’Uropa o pa cualquier otru sitiu de la cordalera. Yo nunca lu topé polos altos, pero nun yera cuentu, que muncha xente lu tien alcontrao polos senderos de les montañes. Siempre se dixo que fai más el que quier que el que puede.

El Puchi

La zapatería del Puchi yera’l centru d’atracción de tola chavalería de la redolada, había carreres pa llegar y coyer sitiu alredeor de Jesús Rodríguez Figaredo, que esi yera el nome del que respondía al alcuñu de Puchi. Nun resultaba raro que nos xuntáremos allí 10 o 15 rapazos na tertulia, en un localín que nun tendría p’arriba de los venti o venticinco metros cuadráos, de modo que cuando llegaben los clientes teníen que pelear col zapateru y tolos ayudantes que formábemos alredeor. Cuando llegaba la hora de regatiar el preciu de la reparación, el Puchi sabía aprovechar el ambiente que tenía favorable y entre rises, él discutía el preciu de la reparación con movimientos ampulosos, a lo Charlot y acababa volviendo lloques a les veceres, garrábales pol coldo mientres yos dicía, suelta la pasta que tienes muncha y nun la vas a llevar p’allá, fórmabase la chirigota y les clientes enfurecíense, unes veces en broma y otres en serio, en tantu lu llamaben careru, que por atra parte, yéralo de verdá. Espabiláes teníen que andar si nun queríen que yos la metiera doblada y pa’ncima con cachondeo incluyíu.

Asuntos d'importancia

Los asuntos a tratar na zapatería algamaben tolos temas de l’aztualidá del momento, siendo allí onde tengo sentío les más profundes discusiones filosófiques: El futbol, el ciclismo, les muyeres, el cine, el sentíu de la vida, de onde venimos y a onde vamos…todo cabía na panoplia de les cuestiones que allí se discutíen y había que facelo con propiedá. Una enquivocación, un adxetivu mal puestu, un fallu na costrución de una frase, valía pa que el Puchi y el resto de la concurrencia se estuvieren cachondeando de ti tres meses sin la menor compasión. Había lleña pa toos. 

Un día que taba faciendo el crucigrama, Puchi llevantó la vista con inocencia y entrugó-y a Casomera que onde taba Canadá, Casomera entamó contestando que nun sabía, pero el Puchi insistía, Casomera diba calentándose y dixo-y que nin lo sabía ni-y importaba, pero ente les rises el Zapa aporfiaba, cuando por fin Caso contestó que debia tar pa onde la China o p’allá les rises atronaben el barrio. El probe Casomera de xeografia taba pez y pa tener derechu a tar na zapatería sin que se cachondeasen de unu había que ser licenciáu en altos conocimientos. Otru día, falando de política internacional preguntoyos a Caito y a Ñañel el de La Maña que quienes mandaben en Francia y Alemania, ellos farfullaben dalgo que nun s’entendía demasiao bien y fízoyos escribilo, cuando-y presentaron los nomes, Dellagüer y Degobel, por Adenauer y De Gaulle, tuvieron que aguantar la chifla hasta les Navidáes del añu siguiente.

El Zapaterías Figaredo

Na zapatería formose’l famosu equipín de fútbol sala Zapaterías Fidaredo, col que competimos, mientres nos dexaron, en La Felguera, que otra cosa no, pero el nomatu imponía.

Casomera

Casomera, que acabó de chigreru, trabayó enantes munchos años de mecánicu y tuvo garah.es. Contonos una vez como había sío el su primer día de trabayu. Nun-y gustaba muncho la escuela y en cuantes que pudo, dixo-y al Pa que nun quería dir más a ella, que quería trabayar de mecánicu, que-y buscare un taller pa entrar de pinche y dir deprendiendo. El Pa tenía un conocíu que yera dueñu de un garah.e onde la Costa Verde, pal Pontón de Vaqueros. El día que Caso entamó a trabayar, estrenó el mono de trabayu y unu de los primeros encargos que-y fizo el Xefe fue que llevare una rueda de camión a recauchutar. Por si nun lo sabéis, recauchutábense les ruedes vieyes, cuando teníen gastao la banda de rodaúra, llevábense al recauchutao, que yos apegaba una banda de goma nueva, que recuperaba la rueda pa que furrulare  otra temporada. Pues allá diba Casomera, cola rueda xirando delante d’él, cuando llegó a la cuesta que baxa pa onde les cases del bloque de La Amistá, la rueda, que yera demasiáo grande pa que la dominare un guah.e, entamó a garrar velocidá, Caso intentó frenala como pudo, pero la rueda yera pesada y escapóse-y, fue garrando velocidá, pasó como una salación por delante’l guardia circulación, que taba subíu en un tenderete de fierro en medio la plaza, entre los coches, tropezó contra’l bordillo de l’acera d’enfrente y cola velocidá que llevaba pegó un saltu y entró como un obús pol escaparate de la pescaderia que había nos baxos del Bloque de L’Amistá, españando la cristalera y quedando tumbá entre les parroches y los hombrinos. Casomera vió l’estropiciu que armare, quitóse’l mono nuevu, tirolu pa una esquina y volvió pa casa sin siquiera volver pa recoyer la chaqueta. ¡Eso ye un estrenu nun trabayu y lo demás son cuentos!

Los chigres

Nel barrio, nos años cincuenta había dalgún chigrucu, que lluego a partir de los setenta y de que urbanizaren les cais y fueren tirando les casines de planta baxa pa edificar cases de ocho plantes,  foron siendo sustitiyíos por otros más modernos, hasta llegar a les cafeteríes, les sidreríes  y los restauranes de agora. En casa, nel Nido, apegao al llocal de la tienda había un cuartu, que llamábemos el chigre, que tenía un par de mesuques y onde se servía un vasu vinu de cuando en cuando a dalgún paisanu, pero la verdá paezme que nun se podía contar al Nido ente los chigres del barrio. 

El Nora

Na esquina de la cai Antonio Rodríguez con Aniceto Rodríguez, les aztuales Augusto Junquera y Torrecerredo, taba El Nora. El Nora llevábenlu Flora y Ricardo que teníen tres fíos: César, más p’alante presidente del Adelni, Blanquita y Miguel Angel. César que yera un poco cegatu, usaba gafes de culo botella, trabayaba d’albañil. Cuando llevantaron el bloque que ocupó el Prao de los Soldáos, César, al que-y gustaben muncho les noveles del Oeste, subía les escaleres a medio facer de unu de los portales, lleendo una novela interesantísima de Marcial  Lafuente Estefanía. Los escalones taben sin poner tovía, na rampa de lo que diba ser la escalera taben puestos, provisionales, unos lladriellos polos que esguilaba, en sin aparar de lleer, el buenu de Cesar. A l’altura del quintu pisu finaba la escalera y César, embebíu que taba, nun s’enteró, siguió p’alante y cayó al vacíu. Tuvo la suerte de dir dar colos sos güesos enriba un montón d’arena que n’aquel mismu momento acababa de descargar un camión de los que llevaben material pa la obra y tovía taba la arena mullío. Nun se mató por poques, pero anduvo fechu polvo el resto la su vida.

Miguel Angel, que yera mui presumíu, trabayaba de camilleru nel Hospital Xeneral. Cuando lu topabes pola cai intentaba nun vete, nun tener que saludar a aquella xente de poco pelo que yéramos los vecinos del barrio. 

Blanquita yera una moza mui guapa. Casose con Galán, un transportista somedanu, quedaron a vivir nel barrio y tuvieron un puñáu de neños, neños que entá anden colos camiones furrulando por ahí.

La Flor

Na parte de la cai Torrecerredo de la casa onde taba la farmacia de Don Manuel Estrada, abrió el Bar La Flor, Joaquín Elizondo, un navarru foscu que taba casau con Angelines, que yera la cocinera y dalgún gatu y dalgunos pichones nos tien guisao, Joaquín paecía seriu como un pote, pero cuando lu conocíes dábeste cuenta que tenía un sentíu del humor británicu, téngome llevao mui bien con él. 

Tenía nel bar la concesión del sellao de quinieles  y alcuérdome de la vez que un vecín que yera un poco simple, intentó falsificar los resultaos de un boletu, cambiándo’l sellu, despegándolu con vapor d’augua de la quiniela cubierta  y poniéndolu en otra con los catorce resultaos de la xornada. Claro, al confrontar el resguardu falsificau col orixinal que guardaba la organización de les quinieles, deseguía se descubrió la falcatrúa, y aquello yera delito y la policía detuvo al infelíz,  acusándolu de intentu de estafa. Joaquín, como responsable del sellao, tuvo que declarar y sé que gracies a la su intervención la cosa nun pasó de un apercibimientu seriu. El probe paisano que pensó salir de la miseria con aquella brillante ocurrencia, tenía muyer y dos fíos, que de sobra teníen penes que pasar sin falta de tener en la cárcel al que llevaba el sueldín pa casa. 

Joaquín paecía que taba siempre a lo suyo y que nun-y importaba na lo que pasare al resto la humanidá, pero sé bien de histories suyes, onde se vía que una cosa yera la cara seria y otra la coña que gastaba. 

Les Gemeles 

Otru bar yera el de les Gemeles, los amos, Nati y Ramón tuvieron tres fios: les gemeles y Monchu. Les gemeles puede que tuvieren nome propiu, pero yo pienso que nunca lu supe, yeren les gemeles y na más. Monchu, cuando llegó la democracia metiose na U.X.T. y paezme que fue responsable del trasporte públicu de Xixón. La cabera vez que lu vi pol barrio, andaba solu polos chigres, saludelu y depués pregunté-y a Caito que qué pasaba con él,  el porqué d’aquella frialdá. Díxome, ye bobu. Nun fala con naide, va de chulo y nun lu puede ver ni dios, lo que m’estraña ye que fales tu con él ¡Y estráñame tovía más que te conteste!  Nun se, de neñu yera unu más, vese que la vida puede facenos mudar. 

Casa Regina

Taba tamién Casa Regina, que cerró siendo yo mui nenu, teníen un fiu, José Luís, que trabayó munchos años nes oficines de una empresa mui importante de construcción y servicios, Fomento de Obras paezme que se llamaba. Del bar solo m’alcuerdo que teníen una rana a la que diben a xugar los paisanos y enfrente pienso que se xugaba a los bolos, pero nun sé si yeren ellos los que llevaben la bolera. Yera yo demasiao nenu p'alcordame.

La Rana

P’arriba pal Naranco, na Cabaña, taba el bar El Gaiteru, que yera otru barín con terracina y tamien allí teníen rana. Pol bon tiempu, con una botella de media y media ¿Qué nun sabéis lo que ye media y media? ¡Jolín que antiguo suena! Media y media yera una botella de mitá vino mitá gasiosa. Pa mí, la meyor bebida del mundu. Sigo pidiéndolo nos bares, anque ya nun se pide así, que agora, pa que te entiendan hai que pidir vino con casera o tinto de verano que inda suena más fino. Pues lo que vos dicía, con media y media podíes echar la tarde ganando y perdiendo partides. 

Nunca fui un fenómeno de la rana, de los que meten dos o tres fiches en cada tirada, pero dalguna, de vez en cuando, entraba y como los contrarios tampoco yeren unos fuera serie, les partides prestaben un montón ¡Y costaben poco, que yera lo importante!

La rana habíala casi en tolos bares y toos conocíamos les habilidáes de los contrarios y más o menos echabes les partides contra los que yeren de la tu categoría. 

Enrique y Mediometro

Unu de los campeones de la rana nel barrio yera Enrique el peluqueru, el padre de Mariadela y Margarita, de la casa de p’abaxo de la nuestra, que trabayaba na Peluquería de Calzón, que yera la peluquería elegante d’Uviéu, al pie del Teatro Campoamor. Enrique yera tirador de meter dos o tres fiches en cada tirada de ocho, si xugabes contra él, teníes que facelo cuando tiraba con compañeros malos, porque si yeren regulares, más o menos como tu, ganábate seguro. Taba subidu no alto del podio siempre. Hasta que un día llegó al barrio una compañía de Teatro de les que se poníen a representar na esquina del Bar Nora, que la xente llevaba les silles de casa pa ver la obra que representaben. Con aquella compañía venía un cómicu piquiñín, llamábase o anunciábase como Mediometro y pidió partida, mano a mano, contra Enrique. Tocó-y salir de mano a Enrique y metió tres, tábamos toos viendo ya la victoria del nuestru campeón, pero garró les fiches Mediometro y de la primer tirada metió siete de les ocho fiches que se tiraben y así, paecio, toles les siguientes. Seis cero y metió al probe Enrique. Ganónos a toos. Colamos pa casa coles oreyes gaches y el rau ente les pates, quitónos les ganes de echar una partida pa los siguientes quince díes. 

El Cantábrico

El gran bar pal barrio yera’l Cantábrico. Ya nun yera mismamente del barrio, porque taba del Puente pa baxo y el Puente de baxo les víes de la RENFE yera la frontera. Pero de alguna manera yera la aduana, la puerta d’entrada pa nosotros. El Cantábrico ya tenía otra categoría, mas modernu, más abiertu, más de tol mundu. Tenía la clientela que-y correspondía, la del barrio y la d’Uviéu, pero tenía amás les estaciones al llau, la RENFE y Económicos y muncha xente que llegaba o marchaba de la ciudá facía la primer o la última parada allí, lo que-y daba munchu movimientu. 

Nos chigres de más p’arriba casi siempre topabes los mismos veceros, sobre poco más o menos ya sabíes enantes d’entrar a quien dibes a ver arimáu a la barra, pero onde Don Mariano, nel Cantábrico, cada vez yera distinto. 

El bar, que lluego, cuando pasó pal otru llao de la Cai Xeneral Elorza al facer la ronda norte, dividióse en dos partes, la sidrería que llevaba Antonio, el fíu de Dn. Mariano y la cafetería-restaurante que llevaba Velasco, el xenru, ya tenía categoría de restaurante. Tenía fama la cocina, casera y de fartucar, abundante y siempres cuidó muncho el asuntu de la sidra. Nel barrio nun había ninguna sidrería que fuere solo eso, sidrería y yera nel Cantábrico onde los sidreros atopaben el su ambiente.

¡Eso no se hace!

Un día que taba tomando un café allí, de repente, hebo follón fuera, n’acera, munches voces y munchu xaréu, salimos pa ver que pasaba y topamos que la xente había agarráo a un fulanu que acababa de dar una puñalada a otru, el feridu taba tiráu n’acera sangrando y atendíu por unos cuantos de los presentes,  mientres llegaba l’ambulancia que otros de los testigos ya entraren a llamar. La cuchiellada tenía mala pinta, había un montón de sangre y el feridu taba sin sentiu, entós, unu que taba al pie miu nel chigre, mui puestu, diz-y al puñaleru que se xustificaba diciendo que el otru nun-y pagaba unes perres que-y debía: ¡Eso no se hace! Hombre, ¡Se le dan unas hostias, pero eso no se hace! Y dicía-y lo tou seriu, como si el otru hubiere escupío nun güeyu al que lluego supimos que morrió. Y ye que en El Cantábrico paraba xente fino, que nun s’emporcaba por cualquier cosa, tu.

Peluqueros

En casa, a los guah.es el  asuntu del corte del pelo pasaba poles manos de mio padre, que había mercao una máquina cola que nos pelaba al cero polos laterales, lluego ponía un suplemento y pelaba al dos un poco más p’arriba y pola parte la cresta remataba coles tisories. Los mayores diben a arreglase, bien  con Pepe el gallegu, a la Peluquería de Falín na cai doctor Casal o con Pichi, na cai Antonio Rodríguez. 
Pepe el Gallegu yera un home fuerte, tenía el local na carretera de la Cárcel y solía dir poles cases a cortar el pelo a dalgunos clientes,  si-i tirabes un poco de la llengua contaba unes histories de llobos y de apaecíos de la Santa Compaña que metíen miéu. Tuvo un fíu que se fizo guardia municipal y ye un verdaderu fenómeno como educador vial, enseñando normes a los nenos polos colexos, compón canciones pa enseñayos medíes de seguridá y les mis nietes adoren n’él y tiénenme enseñao dalgunos de los sus hits, que son de lo más aparente.
Falín taba casáu con una de les “de la contra” que decíen en casa, tuvo una fía, Maribel, que se casó con Manoli Carrera, el mecánicu, que tuvo la desgracia de cayer al mar pescando en Villahormes. Aparte de peluqueru yera numismáticu y los domingos ponía un puestu de compra-venta de monedes na Plaza España. Siempre andaba mui pulcru, col su bigotín arreglau y una carteruca baxu’l brazu, onde me parez que llevaba monedes coles que siempre andaba trapichando. La peluquería teníala na Cai Doctor Casal, apegao a la Librería Cervantes.
Pichi yera un mozu bien paecíu, tenía la peluquería na cai Antonio Rodríguez, xunto a la tienda de Olimpia. Al poco de llegar al barrio los protestantes que se asitiaron nel chalé que facía esquina ente les cais Torrecerredo y Menendez y Pelayo, fízose feligrés de la confesión recién llegá. Daquella decíen pol barrio que pa conseguir parroquianos daben bocadillos, galletes y refrescos, nun sé. El casu ye que al poco Pichi cerró la peluquería y dedicose a predicar la creyencia nueva y más palante comentábase que lu habíen fecho obispo. Veíase que lo de la predicatoria yera una carrera con más futuru que’l de les tisories y la navaya.
Peluqueru de categoría yera Enrique, el pa de Maria Adela y Margarita, que vivía pegao a la nuesa casa, trabayaba na Peluquería Calzón, al llao del Campoamor, que yera la peluquería de los señores d’Uviéu. Enrique yera’l campeón de rana del barrio, al que teníamos por una figura de clase universal, hasta que llegó el reto de Mediometro, el titiriteru que lu llevó por delantre y perdió un poco de la almiración que-i teníamos.   
Tamién yera peluqueru Kike Requejo, el hermanu mayor del Merejo, el hombre de goma, trabayaba de oficial con Falín, na su peluquería de  la Cai Doctor Casal.         

© Milio´l del Nido

Memories d´unos nenos de Ciudá Naranco