El
motivu pa escribir lo que vien darréu dánoslu la necesidá de lluchar escontra
l’escaezu. Lo que va de seguío nun ye la epopeya de un héroe de película
americana, son más bien retalucos de la vida de la xentina que, normalmente,
nun tien cabida nes páxines de la historia con mayúscules, pero que
abarruntamos que tien la su importancia, importancia que queda tapecida pol
falsu rebrillar d’esta vida que nos fabriquen de plástico y oropel, d’esta vida
na que tenemos tiempu pa too menos pa pensar. Esta vida na que nos venden que
ye mui importante lluchar escontra l’estress, o como diaños se diga y pa eso,
cuando nun tas trabayando, hai que viaxar, hay que tar ocupáu como seya, pero
nun hai que cabilgar, eso non.
Los viaxes,
a poder ser, organizáos, de forma que tas nos paises, pero nun tas coles
persones, la vida ordená de forma que cuando termines de trabayar tienes una
película importantísima pa ver, o un partido del pelotu nel que se xuega too, o
una carrera ciclista, o el campeonato mundial de…, si nun te da por esi tarrén
tienes que enterate en sin falta de la vida de tal princesa o de tal artista,
de aquella modelo o del roqueru o’l futbolista de turnu… El casu ye llevate del
ramal, a les carreres.
Trabaya pa pagar les hipoteques, merca esto y
aquello y aquello y aquello otro, viaxa, viaxa, que tas cansáu y tienes que
relaxate. Pero nun se te vaiga ocurrir tumbate embaxo una figal, que eso nun
tien glamur, vete a l’axencia viaxes y merca un tour pa onde te pete y si nun
puedes pagalo agora, nun te preocupes nin, en diez mensualidáes despaches. Lo
xusto pa vendete el siguiente enfotu, pa tenete encadenáu otru añu más. Y asina
hasta que arrevientes.
Pero
parate a ver de onde vienes, que ye lo que de verdá necesites, qué ye lo que de
verdá te paga el trabayu de vivir, eso nin se te ocurra. Nun seya que te dé por
baxate de la rueda… y eso si que non. ¡Hasta ehí podíemos llegar!
O seya,
que si tenéis munchu apuru, si tais estresaos, si necesitáis relaxavos, como
dicen perhí, pasái de lo que sigue, nun echéis tiempu en balde, que esto nin
tien glamur, ni maldita la falta que tien d’ello. Si polo contrario, nun vos
importa perder un ratadín en alcordar otres formes de vivir, que fueron les
formes de vivir de los que peinamos canes, o si inda nun les peináis, pero
sóbravos vagar pa mirar un poco de onde vien esti país, de onde salen esos pas
o esos güelos a los que nun entendéis, igual nestes páxines alcontrais dalguna
güelga que vos faiga columbrar dalgo que, agora mismo, paez una historia de
otru planeta.
Vosotros
mismos.
© Milio´l del Nido
Memories d´unos nenos de Ciudá Naranco