Balagué
Ente los
deportistas destacaos del barrio hai que conseñar a Luís Balagué, “El Ladi”,
que llegó a ciclista profesional de categoría, con victories sonáes na Vuelta a
Asturies y la Vuelta a España y con un montón de participaciones destacáes nel
Tour de Francia y nel Giro de Italia. Luis yera mui flacu y el Ganso, al que-y
paecía que sedría porque comia poco, animábalu a garrar tomates y lechugues y
lo que hubiere poles güertes poles que pasaba de la que entrenaba: Coyes
y garres, fáiste que vas a cagar y pañes un par de lechuguines o un tomatucu,
que tienen munches vitamines. Contaba’l buenu de Santos que anque vixilare
l’amu, siempre había manera de sacar pa enllenar el banduyu. Un día que taba
cola bici por onde’l colexu Loyola vió unes lechugues que taben nel su puntu na
güerta de Calín, el lecheru, pero la madre de Calo siempre taba mirando pola
ventana la cocina, porque andaba mosqueada cola presencia sospechosa del
bicicleteru, “pues na, de lo más fácil, fice como que nun la vía, tiré de
cintu, baxé los pantalones como si fuere a poner el güevu, agacheme y antes de
que diere tiempu a la menor sospecha, ya tenía el par de lechugues na
saquetina” contábamos depués bien argullosu.
Balagué
llegó a ser llugarteniente destacadísimu de Perez Francés, que yera el meyor
ciclista español de la época, pero a Luís sobrába-y fuercia y clase pa facer de
gregariu. Contome una vez Errandonea, otru ciclista vascu de los famosos
n’aquellos tiempos y col que coincidí una nueche nuna terraza de la Plaza’l
Paragües, que en una etapa del Tour, nos Pirineos, subía escapáu el Tourmalet
ente la niebla, cuando lu adelantó Balagué, que llevaba a rueda al su xefe,
perdiolos de vista y siguió tirando p’arriba como podía, bueno, diba terceru
tovía, pero un par de kilómetros p’arriba d’ente la niebla, pero p’abaxo, de
vuelta, cruzolu Balagué como una flecha, nun entendía nada ¿Qué facía aquel
llocu desandando lo que ya había escalao? Aclarose al poco, cuando lu volvió a
adelantar Luis, pero esta vez llevando a rueda al líder de otru equipo, que se
ve que-y ofreciera perres al cambiu de la ayuda.
Coses de
Luís, que ya tenía fama cuando aficionáu de que, en les carreres que se
organizaben poles fiestes de los pueblos y los barrios, como yera el
meyor, vendía-y la victoria al que él veía como más capacitáu pa quedar
segundu, a cambiu de la mitá del primer premiu y él quedaba segundu, colo que
cobraba la mitá del primeru y too lo del segundu, o sea, 500,- pesetes pola
mitá del primeru, más ochocientes del segundu, mil trescientes. Col apañu
ganaba un trenta por ciento más. Nenos, son negocios y la vida taba mui dura.
Los Poladura
Los
Poladura, con Pinichi y Figueroa yeren les figures que dominaben el mundiu del
pelotu en el Prao de los Soldaos, que igual servia de polideportivu que de
centro cultural, taller de remiendos o sitiu pa variar la llana de los
colchones, esbillar los arbeyos y les fabes, tender la ropa, pelar les patates
y los tomates de la proxima comida familiar, facer de cuadra pa los percherones
de Castejón o de les vaques y oveyes de los demás vecinos o prau de la fiesta
del barrio, que de aquella, nun sé porqué, taben dedicáes a San Agustín. Pa too
servia el Prao de los Soldaos, al que llamábemos asina porque allí, el exércitu
tenía una cuadra medio abandoná. Aquel prao sí que yera multiusos. Y nun pongo
más na relacion porque estoy hasta mañana.
Los
Poladura yeren diferentes en casi too, la su familia yera menos asequible que
les demás families, el padre yera encargáu de Vigil Escalera, una empresa de
materiales de costrucción, que había na cai de los Almacenes Industriales, la
ropa que usaben estaba más a la moda que la que gastábemos los demás
guah.es. El mayor parecia un señoritu de la cai’Uria, Kaki, el pequeñu, yera
más sociable pal resto de los mortales y solo destacaba pola figura de atleta
que siempre tuvo. Aunque atleta, atleta, yera Jose, el mayor, que yera campeon
nacional de escolares en saltu a lo llargo y la su marca de 6,89 metros, record
de Europa junior durante venti años, por riba de rusos, alemanes, ingleses y
demás, y eso cuando España en atletismo yera un erial.
El Prao de
los Soldáos llamábase así porque había un destacamento de militares, con una
cuadra onde los infantes del Milán guardaben les mules. Unu de los recuerdos
que caltengo ye de cuando entrábamos los guah.es a robar algarroba de la que
yos quedaba a les mules nel piselbe. Sabía bien, tenía un tastu raru, pero
agradable, paezme que tovía guardo el sabor nel baúl de la memoria.
Pa entrenar
los saltos a la llarga de Jose Poladura, ficimos un fosu nel prao Villar, que
yera un praín bastante llanu y más recoletu que el de los soldaos.
El prao Villar yera la frontera natural entre la Ciudá Naranco y La Colonia
Astur, taba apegáu a La Centralilla d’Hidroellétrica del Cantábrico, onde tuvo
lluego la Parroquia de La Mercé y fue llugar a veces de enfrentamientos a
pedráes pa disfrutar del sitiu y echar los partidos los de un barrio o los del
otru. De aquella tovía a la parte más allegada a Uviéu, dende les víes de la
RENFE a la Carretera la Centralilla llamábase la Colonia Astur, el nome
perdiolu cuando se fizo la Asociación de Vecinos, nel añu 1975 nel que se
decidió nomala AAVV Ciudá Naranco englobando los dos barrios.
El fosu los
saltos fízose cavando con un palote y la arena p’amortiguar les caides aportose
entre toos, robándola poles obres de la contornada, munches veces por xentes
medio analfabetes que nun yeren a lleer les fazañes de Pola na Prensa del
Movimiento. Mientres él saltaba, los demás mirábemos aseláos los vuelos y la
brigada de obres que habíamos formao, diba recreciendo el fosu que, a
pocos y a pocos quedaba pequeñu, sobre too cuando cortaron el Prao Villar pa
facer la continuación de lo que agora ye la Cai Torrecerredo, de aquella
nomada Aniceto Rodríguez.
El éxito
del fosu atléticu solo tuvo comparanza con el de Chelo, la hermana de La Nena.
La Chelo yera una real moza que ganó el concursu de Miss Casera de Uviéu,
concursu que la popular gaseosa organizara pa promocionar la venta del
produztu, de la que acababa coles marques gasioseres de tola vida: “La
Espumosa”, “La Panera”, “La Pitusa” y toes aquelles. La Chelo que llamaba
l’atención normalmente polo guapa, cuando ganó el concursu ya fue l’acabose, tol
barrio presumía de tener a la rapaza más guapa d’Uviéu.
Jose
Poladura yera la mayor figura que pululaba pol barrio, p’ancima yera un mozu
que mercaba tolos dís los periódicos de Madriz y de Barcelona, lo que nos facía
pensar que taba al pie de recibir el Premiu Nobel.
El hermanu
pequeñu, Kaki, cortexó un montón de años con La Nena, que yera la hermana
pequeña de La Chelo, diez o doce años taríen de rellaciones, pero un día, poles
bones, dexáronlo, sin que naide supiere les razones. Esto, nun barrio onde tol
mundu conocía les novedáes de tol mundu, fue de lo más raro, ni una voz, ni
siquiera un comentariu, pero tampoco estrañó demasiáo. Asina yeren los
Poladura.
Figueroa y Pinichi
Figueroa yera fíu de un funcionariu de prisiones, vivíen onde’l Loyola y xugaba
d’estremu, rápidu y habilidosu como un esguil, yera de los más almiraos polos
pequeños, que apreciaben la velocidá, el regate y el pelligru que llevaba pa la
puerta del contrariu.
Pinichi
vivía pegau a la casa de los Cabal, los periodistas, yera fiu de Veneranda y
Nicasio, que trabayaba nos carrosferriles y yera natural del valle de les
Luiñes, xugaba de defensa central o medio, tenía mui bona estampa, yera de los
que llevantaba la tiesta, miraba como se desmarcaben los compañeros y daba
pases llargos con pelligru. Destacaba porque nun yera de los de la patadona,
yera de los estilistas.
Nel barrio, vecinos motorizaos había pocos, a partir de los años sesenta, cuando llegaren los Seat 600, entaron a vese circular poles cais cacharros a motor, pero enantes, yera raro ver movese a naide motorizau, por eso, los que teníen moto, destacaben. De frente a la nuesa casa, el consumeru movíase en una Montesa, pero el gran motorista del barrio yera Parugues, que vivía detrás de la Centralilla de Hidroellétrica y competía en carreres que se organizaben a veces poles fiestes de les villes, pero la figura en Asturies yera Atorrasagasti, un mozu de Xixón que llego a Campeón de España en 125 cc un par de veces. Un poco más p'arriba, nos sesenta, destacó muncho Santiago Fernández, que participó más de una vez nes Veinticuatro Hores de Montjuich, con bien bonos resultaos ¡y menudu méritu! Santi, tiénmelo contao él mismu, pa correr na preba barcelonesa, tenía que salir un día enantes de casa, montau na moto cola que diba competir, llegar allá, correr la preba y al finar, tornar pa casa montau na misma burra ¡Al pie de sesenta hores na moto en tres díes! Eso yera ser deportista heróicu y lo demás, cuentos.
Les Motos
Nel barrio, vecinos motorizaos había pocos, a partir de los años sesenta, cuando llegaren los Seat 600, entaron a vese circular poles cais cacharros a motor, pero enantes, yera raro ver movese a naide motorizau, por eso, los que teníen moto, destacaben. De frente a la nuesa casa, el consumeru movíase en una Montesa, pero el gran motorista del barrio yera Parugues, que vivía detrás de la Centralilla de Hidroellétrica y competía en carreres que se organizaben a veces poles fiestes de les villes, pero la figura en Asturies yera Atorrasagasti, un mozu de Xixón que llego a Campeón de España en 125 cc un par de veces. Un poco más p'arriba, nos sesenta, destacó muncho Santiago Fernández, que participó más de una vez nes Veinticuatro Hores de Montjuich, con bien bonos resultaos ¡y menudu méritu! Santi, tiénmelo contao él mismu, pa correr na preba barcelonesa, tenía que salir un día enantes de casa, montau na moto cola que diba competir, llegar allá, correr la preba y al finar, tornar pa casa montau na misma burra ¡Al pie de sesenta hores na moto en tres díes! Eso yera ser deportista heróicu y lo demás, cuentos.
Cachito
Enfrente del garaje de Manolo Carreras vivíen los Montes, paezme que yeren una familia de les de enantes, nel su pisu taba una hermana col maríu, el fíu y la otra hermana soltera, Lola, que yera una muyer grande, de remangu, el guah.e, Ricardo, estudió pa mayestru y xugaba al hockey sobre patines nel Cibeles y non un Cibeles cualquiera, nel Cibeles que ganó la final de la Copa’l Generalísimu en Salamanca, al Barcelona na menos.
Na cancha los patines Ricardo tornábase en Cachito y tengo entendío que gano’l nomatu porque lu asemeyaben xugando al fenómeno catalán, precisamente del Barça, Cacho Ordeig, milenta veces internacional cola selección española, Campeón del Mundiu y d’Europa delles vegaes. Ricardo parecíase a él xugando y quedó-y pa siempres lo de Cachito.
La familia coló pa vivir n’Avilés cuando entamó lo de Ensidesa y desapaecieron del barrio. A Ricardo téngolu vistu dalgunes veces por Pola Siero, porque casó con Carmen, también mayestra y polesa y ye de los que cuando nos vemos, píntasenos la sorrisa na cara y chamos con gustu la parrafada.
© Milio y Chuso los del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu