Caballos
hubo dos nel tiempu que fuimos neños, el Moreno y el Tordo. El Moreno tenía
males pulgues, yera un veteranu, roxu y duru como una peña y taba fartu de
tirar del carro, tenía toles zunes del mundu, pegaba coces y si nun andabes al
tantu, metíate un mordigañazu que te dexaba el brazu o donde te pillare,
contentu. El Tordo, yera más noble, de la que lu compraron al facese mayor el
Moreno, taba en sin adomar pal tiru nel carro y cuando lu aparellaron al carro,
armó la de dios. Galopiaba cai arriba y cai abaxo como un posesu y nun estrizó
el carro de milagru. Una tarde entera anduvo el espertu domador que viniere pa
enseñar al probe bichu y tola demás familia corriendo detrás, agarrando el
carro, frenando, berrando, emburriando
pol probe animal, hasta que poco a poco fue aselando. Cuando se fizo al llabor,
siempre se portó noble y seguru. Menuda categoría daba a unos críos como nosotros,
de once o doce años, dir nel pescante, coles riendes na mano, guiando el carro
por tolos barrios d’Uviéu mientres se repartía la llexía.
© Milio´l del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu