Nel
barrio conocíamos-nos toos, que anque les families fueren grandes, en cada casa
vivía solo una, porque les cases, la mayoría, nun teníen pisos, yeren de planta
baxa y les poques edificaciones grandes, nun pasaben de les tres altures. Lo
que nun yera raro ye que hubiera dalguna familia realquilá, que ocupaba una de
les habitaciones de la casa y tenía derecho a cocina. O sea, que tenía derecho
a un cachín de la chapa la cocina pa poder facer la su comida.
De
toles maneres yeren años malos, de munches necesidáes y tol mundu tenía que
furrular. Muncha xente mayor que aportaba de los pueblos, nun cobraba pensión,
porque d’aquella, la xente del campu nun tenía seguridá social, ni había d’eses
pensiones non contributives ni na paecío y mientres podía, tenía que espabilar
pa poder enllenar el platu, asína que los que nun trabayaben nos carros
ferriles o na fábrica de armes, o nes obres na construcción, o polos comercios,
o les oficines, atendíen el güertucu de la parte de atrás de la casa, o
buscábense la vida como Dios yos daba a entender.
La
mayoría de les muyeres funcionaben solo como ames de casa, nun trabayaben na
más que na casa, abondo teníen con atender
a tol personal que abeyaba al pie d’elles. Según lo recuerdo debíen ser
bastante felices, o a mí paecíenmelo, tovía tengo nes oreyes les coples y los
cuplés que cantaben mientres tendíen la ropa o aireaben les cames, claro que
nun sé si siempres canciaben de felicidá o lo facíen p’anubrir les penuries.
Yeren años malos
Había
quien trabayaba la maera, quien el fierro, quien criaba chinchilles, unu tenía
una fabriquina de chapes pa les gaseoses: con unes plaques de fueyalata, una
cizalla y una especie de molde de prensa, facía unes chapes de lo más aparente que gastaben les fábriques de gasioses.
Había xente que cubría recibos pa les empreses o pa la contribución de Hacienda, recibos que se
pasaben tolos meses, de diferentes coses, de los que vendíen a plazos por
exemplu, otros llenaben sobres con azafrán y pimentón, o con manzanilla y otros
floritos pa les farmacies. Había modistes que cosíen prendes de ropa o facíen
reparaciones, en munches cases punxeron el cartelucu de Cuéyense puntos a les medies, y yera que acababen de llegar les medies "de cristal" y resultaben cares abondo, por eso, cuando enganchaben dalgún puntu, en ver de tirales, llevábenles a coyer los puntos y aquello yera un negociu que daba perruques.
Habíalos y digo habíalos porque munchos de los que se dedicaben al oficiu de texeor, yeren paisanos, lo que sorprendía bastante d’aquella ¡Un paisano faciendo ropa! Sería un poco manfloritu. Pues eso, que texíen prendes de puntu, xersés y niquis o chaquetines, con unes máquines que se ficieron populares entóncenes…
Habíalos y digo habíalos porque munchos de los que se dedicaben al oficiu de texeor, yeren paisanos, lo que sorprendía bastante d’aquella ¡Un paisano faciendo ropa! Sería un poco manfloritu. Pues eso, que texíen prendes de puntu, xersés y niquis o chaquetines, con unes máquines que se ficieron populares entóncenes…
En
xeneral, pienso que nel barrio nun había grandes necesidáes, casi toos los que
allí se asentaben, yeren propietarios de la casa na que vivíen, lo que indicaba
un poder adquisitivu, que si nun yera señal de muncha bayura, tampoco escondía
una probeza que asustare.
© Milio´l del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu