Don Constantino Cabal, el sabio

Otru vecín destacáu yera Don Constantino Cabal, el que fue Cronista Oficial de Asturies. Periodista, casáu con Doña Mercedes Valero de Cabal, tamién periodista y pas los dos de Merceditas y Juan Luís, al que ya nun conocimos porque se casara siendo nosotros mui neños, los dos fios tamién del gremiu de la prensa.

Don Constantino yera asturianista, n’aquellos tiempos escribía a vegáes n’asturiano y tien fechos trabayos de recopilación de cuentos y lleendes d’esta tierra. Unu de los sos informantes yera el nuestru güelu Chus, y así figura n’algunu de los llibros que Don Constantino espublizó. En la nuesa casa esta familia yera mui importante y veréis porqué. Los Cabal tampoco teníen teléfono y yeren de los que más llamáes recibíen, raru yera el día que nun había que dir una o dos veces a avisalos de que teníen llamada, ellos taben agradecíos poles molesties y una manera de compensar eses molesties pagábenla llevandonos los periódicos vieyos del Diario de la Marina, de L’Habana, del que Don Constantino había sío director y que-y mandaben de allá, nos trasatlánticos que llegaben al Musel. Cada quince o venti díes dábennos un montón de periódicos vieyos, colos que, aparte d’enteranos de les noticies cubanes, proporcionaben un montón de papel pa envolver na tienda, lo que nun yera ninguna tontería porque con ellos aforrábense un montón de perres en papel d’estraza. Apaños d’aquellos tiempos.

Don Constantino tenía el probe una curiosidá que nos llamaba muncho l’atención a los neños: nun pronunciaba el soníu K, yera incapaz de facer sonar la c fuerte, polo que él llamábase a si mismu don   -Onstantino -Abal. Reíamonos muncho en casa de la vez que llamó desde el nuestru teléfonu a Alfonso Chalonga, el fontaneru, pa que viniere a repará-y un  -añu y el probe Chalonga volvíase llocu, porque veíase incapaz de solucioná-y aquel problema, nun sabía cómo arreglar los años malos.

Chalonga

Esti Chalonga, el fontaneru, paraba muncho n’el Manantial, el chigrón que taba na esquina de San Bernabé con Nueve de Mayo, trabayaben allí de camareros un par de hermanos ximielgos, mui serios, mui trabayaores, pero que, los probes, d’estudios andaben mal y Chalonga gastábayos bromes llamando por teléfono al bar y preguntando por Miguel de Cervantes o Rodrigo Diaz de Vivar… el personaxe históricu que se-y ocurriere, entós los camareros vociaben por tol llocal el nome del llamáu, hasta que se escamaben de les rises que se llevantaben, entós volvíen rabiáos a insultar al misteriosu llamaor, lo que aumentaba les rises de tola concurrencia.

Higinio-Hifer

Na acera d’enfrente tenía la su imprenta Higinio Fernández, Hifer, imprenta que agora, ta na cai Lorenzo Abruñedo y que lleva el su fiu Ángel. Higinio yera de Barcia en L.luarca y perante munchos años, la su imprenta yera la imprentina del barrio, onde se encargaben les tarxetes de visita y los sobres y el papel timbrao. Col pasu los años y la modernización de los sistemas d’impresión la cosa camudó enforma, pámeque un poco más apriesa de cómo yera pa camudar Higinio y así, a los pocos, Ángel fue tomando les riendes del negociu, con tolos enguedellos de la informática que agora se gasten nes imprentes. Higinio, con tolos años que tien enriba, sigue siendo una institución nel barrio.

© Milio´l del Nido

Memories d´unos nenos de Ciudá Naranco