El Aldelni, buscando la gloria

César el del Bar Nora, yera amás el Presidente del Arenas del Naranco, el Adelni, el equipu de futbol que paseaba con argullu el nome del barrio polos campos de Asturies. Ente los miles d’anéudotes que protagonizó el equipo, alcuérdame munchu una que tuvo de principal actor a Carlos Corrales “El Besugu”. Carlinos, del que ya falamos n’otru apartao, yera de lo más simpático que te podíes echar a la cara, pequeñucu y feu, colos güeyos saltones que y daben el nomatu, tenía la llengua afilada como una culiebra, yera  llistu, rápidu y pelligrosu como una raposa y futboleramente falando,  estremín de finu estilo, del que se recuerda especialmente un partido en Les Segáes, nel que en un momento en que-y tocó sacar un corner, colocó el pelotu con munchu cuidao na esquina y llevantando la cabeza con atención, entamó a recular mientres agüeyaba los movimientos enredaos de tolos que peleábamos nel área pa rematar el centro que se avecinaba.

El momento yera de la máxima tensión, el resultao taba en empate a cero y faltaba poco pa finar el tiempu reglamentariu, Carlos diba reculando despacín, mirando con pricuru onde diba colocar el balón, los xugaores de los dos equipos peleaben nel área, unos pa desmarcase y otros pa cubrilos, sin dexar de mirar ni un segundu pa la esquina de onde tenía que venir el centro, formando una especie de baile por parexes que paecía talmente unu de los bailles de la película de “Siete novies pa siete hermanos”. En medio la tensión, de repente, el Besugo entamó a facer una serie d’esparabanes, llevantó los brazos con un impulsu violentu mientres doblaba les rodiyes, repitió estos xestos un par de veces de forma espasmódica y, de golpe, esapaeció como si lu tragare la tierra. Nosotros, n'el área, paramos les carreres y los emburriones, hipnotizáos poles contorsiones de Carlinos.

Al esmucise, quedamos un segundu como petrificaos, hasta que unes voces pidiendo auxilio, entrecortaes pola inxestión violenta d'augua, acompañáes de manotazos y chiscadures, cola apaición-esapaición de la cabecina a ras de tierra, ficiéronnos correr desesperaos pola evidente agonía del Besugu. Al llegar al corner vimos unes tables rotes y medio podres, que taben enriba un pozu enllenu d’augua y que yeren les que habíen tragao al probe Carlinos. Nun se nos afogó de milagro, ¡quiciavis porque yera’l Besugu!

© Milio y Chuso los del Nido

Memories d´unos nenos de Ciudá Naranco