Los perros de la casa
Al
Sambo, que debía tener dalgo de mastín lleonés, al probe había-y tocao el papel
esclavu. Taba siempre atáu nel patio de atrás, menos poles nueches, cuando se
zarraba, que mio güelu dexábalu sueltu. Yera el encargáu de defender la fábrica
y la ganadería. Yera un perrón grande y rubiu, mui fieru y mui amu del so
territoriu. Pol día, cuando daquién de la casa andaba por allí, nun
s’esprecetaba si entraba dalgún forasteru, siguía tranquilu, si nun había naide
de casa “daba cuenta”, pegaba un par de lladríos d’avisu. Otra cosa yera na
nueche, cualquier movimientu sospechosu nos patios de tola manzana, marcábalu
el Sambo col so vozarrón impresionante.
Alcuérdome
de una vez que a los guah.es de la casa
dionos pena el probe perru, siempre amarráu y sin que nos vieren los
mayores, soltámoslu. El probe animal, cuando se vio llibre, salió corriendo a
escape, llegó al portón que daba pa la calle y que taba abiertu, allí quedó
paráu, miró desconcertáu pa los dos
llaos y volvió mansulín a echase al pie de la so caseta. Nun se quien quedó más
impresionáu de la experiencia, si el perru o nosotros. Aquel perrón, grande,
fieru, que se ponía como un basiliscu al menor ruíu no prieto la nueche,
acobardáu al vese sueltu. Con miéu a la llibertá, Paecionos tar viendo en direutu
una parábola del Antiguu Testamentu.
Les vaques
Los que
nun hayáis tenío vaques en casa, nun podéis saber lo que yeren les vaques
n’aquellos tiempos. Les vaques ocupaben un sitiu na familia, yeren muncho más
que animales domesticos. La familia entera preocupábase de l’alimentación y la
salú d’elles. Si taben o nun taben tristes resultaba motivu de comentariu: mira,
la Estrella, tien los güeyos tristes ¡Nun-y daríes el verde caliente, he!
Mañana
hai que llevales a pacer al monte, que el prao de acá hai que dexalu pa verde.
Vas llevales tu, pero alcuérdate de que nun beban na charca, que esi augua ta
malo y nun yos sienta bien.
La
Alegre ta tuella, hai que llevala al toro, tienen unu mui bonu na Quinta
Herrero, pero ye mui grandón, val más llevala al del Chavolero, que ye más
terciáu y vai meyor pa ella.
Llabor diaria, llindiar
LLevales
a pacer al prao, dir a llindiar, esto yera ocupación de mañana y tarde tolos
dís, si el tiempu nun lo torgaba, y pa torgalo’l tiempu tenía que cayer lo que
nun ta escrito, que ni el orbayu ni un poco lluvia yera bastante pa dexales sin
salir a pacer. Normalmente esa yera llabor de a diario de mi tiu Gonzalo, pero
munchos domingos o poles vacaciones, tocábanos a los hermanos mayores llevales,
porque Gonzalo tamién tenía derecho a dalgún día llibre. Sí sí, tenía derecho al
descansu, pero les vaques teníen que pacer. Había que sacales de la cuadra y
dir con elles, curiando pa que nun se metieren en dalgún xardinucu o en dalgún
prao enantes de llegar a onde les lleváremos, lluego, les tres o cuatro hores
que teníen pa pacer, había que tar pendiente, porque elles, siempre que podíen,
tentaben salise del su prao a buscar otres yerbes más petecibles, que, por
supuestu, siempre yeren les que nun yos correspondíen.
Muncha de l’afición a la
lletura débola a aquelles hores, na compaña tranquila de les vaques, el tiempu
de lletura siempre taba acompangáu poles llavanderes, les paxarines que
picotiaben ente les yerbes que la Estrella y l’Alegre removíen col focicu al
pacer y que muncho me llamaba l’atención ver. Así que, llibru abiertu, de xemes
en cuando mirada pa ver como taba la ganadería y vuelta pal llibru. Claro que a
veces, el llibru distraíate tanto que, cuando alcordabes, ya taba la vaca
pasando pal prao del vecín y entóncenes, saltu y carrera que te crió pa volvela
al riegu. De toles maneres, les hores del llabor de llindiar son unu de los
recuerdos más guapos que guardo.
L´argullu la familia
Un añu,
mio güelu llevó a La Estrella al toro de la Quinta Herrero, que tenía pedigrí
que dicíen y parió una xata de bandera, cuando tenía un añu lleváronla a la
esposición de ganao de Avilés, que yera la de mayor categoría d’Asturies y
ganó’l primer premiu. ¡Menudu argullu pa la familia! ¡Teníemos una xata
campeona de Asturies! Cuando llegó la hora de llevala por primer vez al toro,
anduvieron escoyéndolu con pricuru, aquella xata merecía lo meyor. Pues el toro
al que la llevaron resultó que taba sifilíticu y al quedar preñada, la nuestra
xata, la meyor d’Asturies, la flor d’entre les xates, entamó a enfermar, cayó-y
un cachu de la peyella de una de les pates de atrás y hebo que matala. Años se
pasaron llamentando pol dolor de la perda y non solo poles perres que
representaba, pela rabia de tener aquella maravía y perdela.
¡Que
diferencia coles vaques de les granxes d’agora! Numberáes, coles oreyes
atarraquitáes de crotales, colos cuernos aserrucháos ¡En sin alma nin
personalidá! Qué importa que den milenta llitros de llechi, lo que de verdá dan
ye pena, son máquines que nun dan calor, porque nun tienen amor.
© Milio´l del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu