El branu, l´iviernu

El branu yera’l tiempu la llibertá, munchos díes tocábamos dir a llindiar les vaques al prao. Como los praos que teníamos taben bastante bien zarraos, el llabor dexábanos tiempu pa buscar niales, pa cazar grillos, pa lleer, que siémpre díbamos con una novela embaxo’l brazu, casi siempres del oeste, de Silver Kane o Marcial Lafuente Estefanía, delles veces de Zane Grey, que yeren más gordes y que nos gustaben más, pero nun abundaben tanto como les de los otros.

Lo de llindiar yera un llabor que anque fastidiaba un poco, porque te quitaba de tar colos amigos, también prestaba, les vaques dan tranquilidad, ver les llavanderes picotiando al pie d’elles y sobre too, lo que más prestaba yera oyer a los paisanos de pa Constante canciar tonaes al alto la lleva, dalgunos acompasando el son col martiellu de cabruñar.

Les vacaciones del branu

Les vacaciones del branu nun solíen marcar grandes viaxes ni desplazamientos a parte ninguna, solíen pasase  en casa ¡Onde díbamos dir!, lo que camudaben yeren les obligaciones, ya nun había colexu, pero teníamos que char una mano na tienda, o na fábrica de llexía, o yendo a llindiar les vaques. A lo más que se llegaba yera a dir un domingo a la playa, nel tren, a Xixón o a San Xuan de Nieva, D’ellí solíamos tornar con unes quemadures nos llombos de munchu cuidao, quemadures que mio güela combatía chándonos aceite d’oliva por riba, lo que nun sé mui bien si nos aliviaba o nos fritía.

De toles maneres aquelles excursiones a la playa yeren tou un acontecimientu pa nosotros, dende los preparativos que entamaben por buscar el traxe bañu y les toballes el díi d’enantes, hasta’l madrugón pa facer la tortiella y los filetes empangaos y la empanada. 

El viaxe

El viaxe na Renfe yera toa una aventura, Los vagones diben atarraquitaos de xente, porque nun veníen demasiaos domingos bonos nel branu y cuando veníen, tolos uvieínos que podíen, subíense al tren p’aprovechar la oportunidá. Nosotros solíamos dir con Papa y Mama tolos neños entre el añu d’edá del más pequeñu o los catorce o quince del mayor, en total seis u ocho, pero además siempres coincidíamos con dalgún vecín o familiar colo que el grupu nuestru ya enllenaba mediu vagón.

Subise al tren yera una odisea, colos pequeños colgaos del pescuezu de los mayores, les cestes de la comida, les pelotes, los calderos, los salvavides, les toballes y dalguna muda, en medio’l mogollón de xente que asaltaba los vagones, marcaba el entamu de un día maraviosu.

Los baños

Depués de los baños ¡Cuidao, nun te metas tanto! ¡A ver, vosotros, los mayores! Atendéi pa los guah.es, que nun vaigan solos pal augua, llegaba la hora comer y sacábense de les tarteres los filetes y les tortielles y la empanada, too envuelto en papel d’estraza grasientu y allí, toos en corru, apartando les formigues si habíamos topao un prao o soplando les arenuques si xintábamos na playa. Pela tarde más bañu y más xuegos, más carreres detrás del pelotu y más buscar a dalgunu que se había perdío porque fuera a garrar bígaros detrás de unes peñes y vuelta pal tren, ya colos escozores de les quemaúres del sol y la brisa’l mar nel llombu. Esa nueche el suañu tardaba en llegar, entre les emociones del día y les quemaúres nel llombu, vueltes y más revueltes na cama enantes d’aselar.

Yera duro, pero yera un día pa guardar na memoria, yera’l día del gran viaxe del branu: coyer el tren, dir a la playa, bañase, garrar bígaros y llámpares baxo’l sol y el salitre. Volver pal tren col culo moyáu, porque los traxes de bañu yeren de tela que nun secaba fácil y al poner los pantalones enriba volvíes cola güelga nel culeru del tu bañu na mar, una estigma que enseñabes, presumiendo, a los amigos, cuando llegabes de vuelta’l barrio

L'iviernu

Pa los guah.es el añu tenía dos partes bien definíes, l'iviernu, que entamaba a mediaos de setiembre, cuando díbemos pa la escuela y el branu, que diba de primeros de xunu a mediaos de setiembre. Nel iviernu yera’l tiempu los fríos, los sabañones nes manes, oreyes y pies, los catarros, les moyaures. Quédenme na memoria les hores d’estudiu nel colexu, cuando teníemos que tar en silenciu, faciendo los deberes o estudiando lo que tocaba pal día siguiente, con un encargau xixilando que nun se falara. Naquel silenciu solo se sentían les toses de los acatarraos, la tos yera la música de les hores d’estudiu.

Cayía nel iviernu tol follón de les Navidáes, que se despachaben con una cena con un pitu de los que se criaben en casa, un arroz con el pitu, que debía pesar cuatro o cinco quilos, yera'l gallu más grande, el que había quedao pa padre aquella temporada,  la sopa menudos con les vísceres del pitu, un poco turrón, unos polvorones y unes peladilles, la botella de sidra de El Gaiteru, que a los neños mayores dexávennos probar un poco y los cantares de los villancicos. 

La Navidá

Les Navidáes yeren pa nosotros un tiempu destacáu, yera’l tiempu de dir a pidir el aguinaldu, los guah.es, los neños, les neñes furrulaben aparte, como en casi too, los guah.es, ensayábamos dalgún villancicu y díbamos poles cases a pidir que nos dieran daqué, unes perrines, caramelucos, unes galletes. Paezme que nos prestaba más cuando nun nos daben nada, porque entós “echábamosyos la perra” que yera cantar al alto la lleva aquello de: En el alto del Naranco/ hai una perra cagando/ pa los amos d’esta casa/ que no nos dan l’aguinaldo. Bueno, eso cantábamoslo y salíamos escopetaos, porque igual nos podía cayer un castañazu.

En les cases esos dís, anque fuere poco, facíase alguna xinta especial, en la nuesa casa matábase’l gallu mayor, lo que nun dexaba de ser una traxedia, dábanos pena a toos, matábalu mio güelu de un hachazu nel pescuezu y según y lu pegaba, soltábalu, porque y daba perceguera y salía el probe pitu corriendo sin cabeza, hasta que tropezaba y cayía esnalexando, lluego cocinábalu la güela Yaya con arroz y siempre cayía algo de turrón y mazapanes o polvorones.

Pero lo más guapo yeren los cantares, cuando terminábamos de cenar podía venir a la nuestra casa dalguna familia vecina, o bien dir, cuando ya yéramos nosotros un poco mayores, a la casa de algún amigu y podía durar la cosa hasta les tantes de la mañana.

Poles ventanes del patio entraben los cantares que se oyíen de les cases de la vecindá.

De los Reis Magos hai que falar de la ilusión de la cabalgata, que nos baxaba a vela el güelu Chus y lluego esperar a que llegaren con los regalos; la pistola, el coche juguete, un libru de cuentos, un tren, un caballito… ¡pero unu, eh! Nun penséis que yera tola retafila, como llega agora a los neños, que yos manden tantes coses que acaben xugando coles caxes d’envolveles. 

Y a los dos dís, pa’scuela, que ya se acabo’l cuentu.

La misa'l gallu - Los Reis Magos 

La misa’l gallu na nueche del fin del añu, con una xinta paecía a la de la Nuochebona y la fiesta los Reis Magos, que se despachaben con una pistoluca o una espada de maera y gracies. El que los Reis solo traxeren una pistola o una espada o dalgo apaecío, nun quitaba un res de la emoción d’esperar por ello, porque anque fuere poco, algo yera y en cuantes salíes a la cai, si nun había sío a ti, a dalgún vecín y habíen llegao con un pelotu y un pelotu pa xugar a alcantarilles ya yera un tesoro de categoría.

Yera tamién el tiempu les nevaes, nun recuerdo ningún añu nel que nun tuviéremos polo menos una selmana de vacaciones pola mor de la ñeve. La Cirila, el autocar que traía los escolinos del Loyola, que veníen del centro la ciudá, nun podía xubir les cuestes del barrio y polo tanto, nun quedaba otra ¡suspendíense les clases! Aprovechábamos les ñevaes pa fabricar unos trineos caseros, colos que furrulábemos polos praos del Naranco, tirándonos a tumba abierta, aprovechando los praos más pindios. Dalgún tien dexao dellos dientes en los sapiazos colos que terminábemos los descensos. Nun vos quiero falar de los resfriaos que garrábemos, con aquella ropa que teníamos, casi siempre xersés de llana, que s’empapaben y tornábemos pa casa como pitinos.

La Selmana Santa

Yera tamién pol iviernu cuando llegaba la Selmana Santa, con toles predicaciones terrorífiques, los Vía Crucis, les procesiones, la visita a la puerta la cárcel cuando soltaben al presu indultau. Lo meyor del asuntu yeren les carraques coles que díbamos pa la ilesia a matar Xudíos. Lo del Holocausto los nazis, paezme una broma comparao coles matances imaxinaries que facíamos los neños. 
Una cosa que nos amedranaba enforma yera la Llei del Silenciu que s'establecía, nun se podía cantar, les emisores de radio solo poníen música clásica, cantu gregorianu, yera too de una ñegrura que amilanaba'l más bragau.

La escuelina

Cuando llegaba la hora d’entamar a dir a escuela, la señorita Angelines tenía un aula, una xaula, al pie de la Carpintería de Pepe’l Moreno, na Cai Aniceto Rodríguez, onde nos amontonábemos trenta o cuarenta rapacinos pa deprender les primeres lletres. Alcuérdome de la señorita Angelines como de una muyer mayor, pámeque tenía una pierna más corta que la otra y debía tener una tranquilidá y una santa paciencia infinita, porque nun guardo na memoria nin palos nin castigos, nin llantos nin traxedies y con cuarenta o cincuenta neños, con edáes que diben de los cinco a los catorce años, aquello debía ser un milagru.

La escuela nun tenía patio, nin zarráu nin abiertu, cuando salíamos al recreo, salíamos a la mismísima cai y nun tengo memoria de problema ningunu, únicamente los sapiazos normales, con tola reciella corriendo detrás del pelotu. Si que m’alcuerdo del pus nes feriduques de les rodiyes o nos coldos, que siempres s’enfestaben. Nada que nos espantare ni a los críos ni a los pas. Tengo miéu que si agora ven un nenu con pus en una ferida, cierren la escuela por miéu al contaxu. Pero d’aquella yéramos duros, salíamos de una guerra y la xente nun s’espantaba por coses de poca importancia, si cayíes y te raspiabes les rodiyes, llimpiabes un poco la ferida con un cuspiazu de saliva y a correr y tirar p’alante ¡Que nun se diga!

© Milio´l del Nido

Memories d´unos nenos de Ciudá Naranco