Restriciones
Dellos díes de la selmana había Restriciones, les restriciones yeren cortes nel serviciu ellétricu, lo que nun sé si sería cosa de Hidroellétrica del Cantábrico o del gobiernu o nun me digas de quien, pero el casu ye que llegaba el avisu de que tales díes de la selmana, de tal hora a tal hora había Restrición, y ¡A escures tol mundu! Menos mal que d’aquella nun había neveres y nun se perdía lo que hubiere n’elles, claro que colo probes que yéramos toos, anque tuviéramos nevera, nun sé que diaños díbamos meter dientro.
La Candilexa
Aquellos díes de restricciones nes cases trunfaba la candilexa ¿Qué nun sabéis lo que ye una candilexa? La candilexa ye un artiluxu que se fai con un poco aceite dientro de un vasu o una taza y una mecha que se pon enriba, flotando. Préndese la mecha y mientres tien aceite va allumando un poco, como una vela, pero salía más económico que la vela. Ver nun se vía un cristo, pero daba unes solombres que los neños pasábamos unes angusties viendo baillar les susodiches solombres que yera un gustu.
De Monacín
Cuando
tenía ocho años, furrulaba como monacín nel Colexu Loyola y tenía que tar allí
a les cinco la mañana, porque yera la hora na qu’entamaben los curas a dar les
mises. Mio güela llevantábame a les cuatro y media, calecíame una tacina llechi
con cacao y, anque la probe taba ya medio ciega por culpa la diabetes y la
insulina, peinábame con tol ciñu pa que fuere guapu p’allá. Un día, na más
salir de casa, tovía yera nueche zarrao, sentí unes ganes de mexar
irresistibles, así que cuando llegué onde lo de Petranova, arimeme a una
paré de lladriellu que taben llevantando, pa echar la mexada, apoyé una mano na
paré… y cayeron dos lladriellos, Taba medio sorprendíu cuando sin saber de onde
me venía, cayome un tortazu en medio la cara que me dexó p’allá. Cortóseme el
mexu cuando ví, de frente a mí, a venti centímetros, la carona fea de un
energúmenu que me berraba fechu una furia, como si yo hubiere tirao les
pirámides d’Exipto. El ostieru yera un obreru que trabayaba na carpintería de
Barmo, onde’l Loyola, que al poco tuvo que retirase por dalgún mal que tenía
nos güeyos. Pasaba lluego los días onde’l Garaje Carreño, a la entrada’l barrio
y buenes ganes pasé de devolvé-y el trompazu. Nunca tuve tiempu. Pero eso sí,
guardar téngoyla guardada.
© Milio y Chuso los del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu