El nuesu mundu

Del barrio, primero que del megollu alcuérdome de les llendes. Véome na salida pal centro la ciudá, pol Puente, pa la Cai General Elorza y paezme ver  la cola xente que se formaba tolos díes delantre de la puerta de Viejo, el curanderu que vivía pegao al Bar Cantábrico, que tenía a los probes penitentes esperando poles manes milagroses que aliviaren los sos males, yera un curanderu afamau, tenía una hermana, América, que vivía na nuesa cai y tamién arreglaba malures nos güesos  y los tendones, pero nun tenía ni la mitá de la fama'l su hermanu. 

Frente la puerta de Viejo taba la terminal de los Económicos, los carrosferriles de vía estrencha y allí  yera un espeztáculu impresionante ver a dos paisanos en camiseta, que dalguna vez habría sío blanca, tiznáos y bañáos en sudor, cómo daben vuelta, con una manivela na plataforma xiratoria, a la máquina del tren. Paecien dos formigues moviendo un elefante.

Les llendes del Naranco

Pola parte más alloñada de la ciudá les llendes marcábenles el colexu Loyola, la Cárcel Modelo, la carretera de Los Monumentos y tol valle de Valdeflora, lo que llamábemos el Vertedorio, que yera el regueru que recoyía les augües de les fontes y lo que llovía poles faldes del Naranco.

Pa la parte del Loyola taba la casa de los Longo, al pa llamábenlu Calzapoco, teníen ganao y formaben una de les families numberoses del barrio, yeren unos cuantos hermanos. Polo de la cantidá de neños y el tener ganao, yeren una familia que se paecía un poco a la nuestra.

Tamién pegao al cole, tenía el su xalé Amador Boto, que llevaba la representación del Orange Crush, el primer refrescu de laranxa que se entamó a vender poles tiendes y nos chigres, el Orange Crush ya representaba l’aniciu de la modernidá. Amador tenía dos fíes muy guapes y con él anduvo una temporada, de repartidor del refresco, el nuestru hermanu Pedro.

Detrás del Loyola, apegao al senderu que subía pa Constante, vivía la familia de Baltasar, Saro, que yera un cazurru al que de mayor, téngolu visto tocar  el bombo, de la qu'entamaron a formase les bandes de gaites.

Pero les llendes siempres estuvieron pa ser forzáes polos descubriores y los guah.es del barrio teníamos alma de conquistaores.

Territorios de conquista

Como territorio de conquista, la primer estaya marcábala Ferreros. La media docena de cases que quedaben detrás de la Cárcel. Así que un bon día xuntámonos unos cuantos neños, Faya, Tono, Jandro, yo… na nuesa base del Prao de Los Soldaos y armáos pa la conquista con forcáos y piedrines como armes llixeres y con cachos de mármol de la Marmolería Cabal de armamento pesáu, entramos a piedrazu llimpiu persiguiendo a los críos de aquelles cases. Nun sé mui bien qué había pasao con ellos pa tener que declarayos el estao de guerra. A mí, por suerte, acabóseme deseguía la munición, lo que me permitió entamar una fuxida más o menos honorable. Ya había fecho la mio parte y había soltáo l’adrenalina pa dos meses.

La fazaña hubiere sío reonda, si nun fuera porque ficimos l’estropiciu de un reló de paré con una piedra, una bala perdía qu’entró por una ventana, onde la carpintería de Arboleya, (nes guerres siempre hebo bales perdíes, lo que agora llamen daños colaterales) lo que llevó a la intervención de los mayores y la cosa ya nun fue tan guapa. Ye lo malo de les batalles: los daños colaterales como dicen los americanos.

Ferreros

La llende con Ferreros marcábala'l taller de Marmolería de Cabal, que taba xusto detrás del Prao de Los Soldaos, de seguío taba la casa onde tuvieron el su taller d'ebanistería los hermanos Arboleya y ente les poques cases del barrio taba la de La Cachonda ¡alcuñu guapu,eh!, la de la Cachonda yera una casería con toles de la llei, con vaques y oveyes y tola piesca.

© Chuso´l del Nido. Traducíu por Milio´l del Nido.
Memories d´unos nenos de Ciudá Naranco