Na
imprenta d’Higinio entamaron nel oficiu Eugenio Prieto y Joaquín, que lluego
medraron, independizáronse y pusieron Eujoa, ya en plan grandón. De la qu'entamaron por cuenta propia, pasaron bien de sustos, porque una de les llabores que facíen yera imprimir octavilles de propaganda antifacista na clandestinidá, escontra'l gobierno de Franco. Cuando a esti país llegó la democracia medraron enforma y durante
un par d’años fueron los sponsors, los patrocinaores, del Balonmano Ciudá
Naranco, que gracies al su patrociniu pudo ascender a la división d’honor del
balonmano español. Un equipín de barrio que se codió colos grandes del deporte, Barcelona y Atlético de Madríz incluyíos.
Al poco
de dexar el patrociniu del balonmano, Eugenio fue elexíu presidente del Real
Oviedo, col que algamó les mayores altures de la historia del nuestru Uvieín,
al que mantuvo catorce años siguíos en primera división, llevándolu a
participar na competición europea. Too ello enantes que el alcalde, Gabino De
Lorenzo, y segare la yerba embaxo los pies, porque la popularidá d’Eugenio
facía-y solombra y corriose que diba ser el su oponente nes elecciones a la
alcaldía, por parte’l PSOE.
N’esi
intre, el alcalde fizo unes declaraciones públiques nes que aseguraba que’l
Uviéu nun podía siguir compitiendo dáa la situación económica, que dependía de
los ingresos de los traspasos de xugaores que facía toles temporaes y que naide fichare a ningún xugaor,
porque al entamu la temporá siguiente diben quedar llibres tolos componentes
de l’equipu, porque l’Uviéu, sin traspasalos, desapaecería poles deldes y
podrían fichalos gratis. Cola información dáa pol aldalde, el traspasu de Cesar el central y Esteban el
porteru, que ya taben vendíos en más de mil millones de pesetes caunu, quedaron en na
y al nun disponer de les perres, nun pudo la direutiva d’Eugenio facer frente a
los compromisos económicos y la federación descendió al equipo.
Pa
quitase un enemigu políticu d’en medio el sr. alcalde nun tuvo reparu en abocar
al equipu a la desapaición, pa rematalu col invento del Oviedo ACF. Al Uviéu solo lu salvó l’afición, que, con
too en contra, empeñose en aguantar a un cuadru condergáu pol descenso
burocráticu a tercera división. Ficiéronse entós 12.000 socios, en una demostración de fanatismu uvieísta
dignu de 12.000 Claudios Mirandas, del que n'otru apartau se fala.
Eugenio
enantes de enredase nel balonmano y el fútbol fuere boxeador aficionáu con un
curiosu palmarés: de nueve pelées que disputó, ganó tres, palmó tres y fizo tres
nulos ¿A que nun ta mal?
Esti
home ye lo que los de fala inglesa llamen un self made man, un home que se fizo
a sí mesmu ¡y pámeque nun se fizo mal del too!
© Milio´l del Nido
Memories d´unos nenos de Ciudá Naranco
Comentarios
Publicar un comentario
Munches gracies pol comentariu