La nuesa familia

La nuesa familia

La nuesa familia nun se xebraba de les otres del barrio, los güelos por parte de ma, llegaron a la Ciudá Naranco casi recién casaos, los dos yeren del conceyu de Tapia, él de Serantes y ella de Villamil, a menos de un kilómetro el unu del otru, pero habíen venío a conocese a Uviéu, onde mio güela servía en una casa de señores de la cai Suarez de La Riva y mio güelu taba de pensión na cai Rosal, allí mismo, al pie. Mio güelu tuviera unos años d’emigrante en Cuba, onde dalgún problema  tuvo, nun se de qué clas, pero de allí salió escopetáu pa Buenos Aires, onde lluego de una temporada, viendo que nun progresaba como pensara, resolvió tornar pa ganase equí la vida.

A la vuelta alcontró trabayu na fábrica de llexía que, más lluego y cola axuda de un pequeñu premiu na llotería, mercó al xubilase’l su patrón. Contábame qu’en la pensión de la cai del Rosal, tolos dís se xintaba la misma cosa, cocíu madrilanu, y que cuando conoció a mio güela enseguida lu ganó pol banduyu, porque los domingos, cuando se xuntaben, ella cocinába-y otres coses y claro ¿Quién se arresistía?

Un menú con indultao

Mientres tuvieron la tienda-chigre, hasta 1958, en casa siempre se cocinaba cada día una cosa, los llunes fabes, los martes lenteyes, los miércoles garbanzos… y allí nun había cuentos, tol mundiu comía lo mismo, menos mio güelu, que los días de los garbanzos taba indultáu y pa él guisábase otra cosa. El indultu habíalo ganao porque de la que llegó d’América, na pensión na que s’abellugaba, comíense garbanzos el dí unu de xineru y seguíen comiéndose hasta’l treinta y un d’avientu, y al casase con mio güela punxo de condición qu’enxamás, nel su platu, apaecieren los garbanzos. Bastantes comiere naquella pensión, na que los amos yeren cazurros y traíen d’allá, de les tierres de la familia, los garbanzos colos que facíen el pote nuestru de cada día.

La nuesa casa

La nuesa casa, El Nido, tenía suétanu, onde se guardaba el ganao, el caballo, el gochu, les vaques, les pites, los coneyos… El baxu, onde taba la cocina y la tienda-bar, y el pisu d’arriba coles habitaciones pa durmir. Y nel patio d’atrás, la fábrica de llexía, onde reinaba mio güelu que yera l'alquimista que trasformaba la sosa cáustica a lo primero, y el hipoclorito de sosa más p'alante y pola comodidá, con el augua, na prestixosa y conocía en tola ciudá, “Lejía El Nido”, cola su etiqueta col ñeru y los cinco güevinos.

El teléfonu

Un elementu mui importante de la nuesa casa yera el teléfonu, que, siendo particular, exercía de teléfonu públicu, como los que había poles tiendes y los chigres de los pueblos. En tol barrio, del puente’l ferrocarril del Norte hasta’l Loyola, casi seguro que yera el únicu que había, o polo menos yera el únicu que servía como si fuere de serviciu públicu. Aquel aparatu atendía a tol barrio, naquellos años nos que les conferencies interprovinciales  y hasta les llamáes a les otres ciudáes y pueblos de la provincia, había que pedilos a la centralita, les xentes del barrio llamaben a les sus families desde la nuestra casa, lo que representaba que llegaben, pedíen la conferencia y teníen que esperar a que la señorita telefonista yos diese llinia, lo que podía suponer una espera d’ entre diez minutos y dos hores, perante’l plantón, quedaba tiempu abondu pa mui sabroses conversaciones. Cuando yera al revés, cuando llamaben de fuera a cualquiera del barrio, allí nos teníes a los guah.es de la casa corriendo hasta la casa de cualquier vecín a dar el recao “Fulano, que dientro de media hora llámente de Tineo”. Esto yera un deporte de a diariu y un pozu de conocimientos de la vida y milagros de tol vecindariu.

Lo que daba pa la cai

Delantre la casa taba el patio, coles ferraúres espetáes na fachada pa que les muyeres de los pueblucos de La Cuesta, que asina llamábemos al Naranco, amarraren los burros, colos que baxaben el llechi, les mantegues y les produciones  de la güerta que traíen pa vender y nos que subíen lo que mercaben y los encargos. Unu d’esos encargos que llamaba l’atención y que yera llabor mui importante, yera que subíen les sábanes y la ropa blanco de los señores d’Uviéu, subíenles pal pueblu pa llavales y poneles lluego a secar al verde nos praos, que les devolvíen blanques que daba gustu… blanquísimes. A veces, cuando mirábamos pa La Cuesta, veíamos dalgún prao blancu, blancu, mismamente como cuando nevaba.

Nel patio d´atrás

Nel patio d’atrás, nosotros nun teníamos güerta, porque nel espaciu aquel taba la fábrica, onde mio güelu componía la fórmula de la llexía y allí, entre toos los de casa, llavábamos les botelles, enllenábemosles, corchábemos, etiquetábemos, precintábemos y metíemos nes caxes, que lluego se repartíen poles tiendes de tou Uviéu, nel carro col caballo. Bones bocaráes de llexía saborguiábamos de la que se chupaba la goma pa enllenar les botelles de la “sabrosa” Llexía El Nido.

Nel patio traseru, aparte de la fábrica llexía, y les cuadres y los cubiles de los animales, tovía cabía un tendayu onde  montaron una carpintería Anselmo y Ángel, dos paisanos serios y formales, que nunca una voz más alta que otra dieron, siempre serviciales. Prestábame sentir falar a Ángel de los sos tiempos de mili, cuando-y tocó tar nel Cuartel de La Montaña, en Madriz, de la que hubo el famosu asalto na Guerra Civil, contábame de los apuros que pasó cuando la xente alzao se yos venía enriba y nun sabíen, los probes soldaos como él, si los mandos yos ordenaríen disparar escontra la multitú. Anselmo yera algo mayor que Ángel, vivía pa la Manxoya,  Ángel taba casáu en Tudela Veguín. Selmo andaba siempre vestíu de mono azul, pero Ángel, en cuantes dexaba les ferramientes, poníase la americana y la corbata y talmente paecía un señoritu de la Cai’Uría.

La familiona

Na casa vivíamos, los güelos, Chus y Arcadia, “Yaya”, los nuestros Pas, Félix y Merce, el tiu, Gonzalo, que había sufrío un paralís de nenu y acoxaba y tenía la mandrecha siempre guardada en bolsu’l pantalón, porque por culpa’l paralís, habíase-y quedao seca y doblada, inútil, y lluego tola recua d’hermanos, que se diben sumando a poco y a poco, hasta facer el númberu doble reondu, el ocho. Milio, Juanjo, Chuso, Pedro, Conchita, Mª Jesús, Jorge y Nani. En casa, por cierto, nun yeren na tacaños no de los nomes Y si no mirá-y, los nuesos nomes completos y por orden son: Felix Emilio, Juan Manuel Joaquín, Jesús José Benito, Pedro Pablo Alfonso, María de la Concepción, María Jesús, Jorge Luis y Ana Luz ¿A que nun ta mal?

© Milio´l del Nido

Memories d´unos nenos de Ciudá Naranco