Les matances

Díes especiales yeren los de la matanza. Cuando se mataba dalgún gallu, por Nuechebona o nel día del santu o’l cumpleaños de daquién, el matarife yera mio güelu Chus. En casa ningunu valía pa na. Matar un pitu representaba una traxedia gorda. Mio güelu, por vergüenza torera, encargábase de la faena, pero pasábalo fatal. Téngolu visto munches veces col pitu garrau poles pates, arrecostalu escontra el tayu y, casi mirando pa otru sitiu, pega-y el hachazu nel pescuezu y, como si quemare, soltar al bichu. El pitu, descabezáu, corría unos cuantos pasos pol patio y tropezando con too, cayía por una esquina, entós tocábame a mi garralu y llevalu a les muyeres, que ya teníen el augua fervierndo, pa que lu escaldaren y esplumaren.

Corar al gochu

Esto yera pa matar un gallu, cuando tocaba corar el gochu, la operación ya tenía otru altor. Venía un matarife de fuera, solía ser un carniceru. Cuando aportaba, ya taba preparáo el augua ferviendo pa escaldar al bichu y pelalu, pero enantes había que sacar al gochu del cubil, subilu enriba la mesa na que se diba a corar, un animal de ciento y pico kilos, que se artresistía tolo que podía, y garralu que nun se moviere. Pa esi llabor taba mio güelu coyendo por una pata, mio padre por otra y el mi hermanu Xuan y yo poles restantes. Les berrides que daba el probe animal sentíense dende la picalina del Naranco. La operación, entre ¡garra bien, guah.e, que nun se te mueva,  y,  espera, espera que se me ta soltando!  Bien podía durar media hora, col probe animal chillando al alto la lleva. Los sudores y apuros que nos costaba, bien lo compensaben lluego los solomos y el picadiellu y les morcielles dulces, que ya taben llistes pa la hora cena

© Milio´l del Nido

Memories d´unos nenos de Ciudá Naranco