Soñar despiertos

Una de les coses interesantísimes que teníamos y que podía ocupanos hores, yera el contar les películes que veíamos. El que diba al cine tenía que contar a los amigos la película que viera. Cuando dibes, veíes la peli con tolos sentíos puestos en ello, porque lluego había que contala, por eso, el que les contaba bien, tenía un públicu devotu. Dende que llegó la tele, tol mundu ve cine a toles hores y a naide se-y ocurre ponese a contar con pelos y señales lo que vio, pero de aquella, a lo meyor dibes al cine una vez al mes ¡Si dibes! Y una película yera una ventana abierta a mil aventures, podíes vivir milenta vides diferentes, así que aprendíes de memoria el guión y quedábeste colos chistes o les frases importantes, porque había que contalo a los que nun habíen tenío la suerte de poder velo: “Entós llegó el mocín y díxo-y al malu “vas morder el polvo, forasteru”, de repente el malu tirose de llau sacando el revólver, pero el buenu, que yera muncho más rapidu, sacó les dos pistoles, que llevaba nes cartucheres al revés, coles culates pa’lante, garró la que llevaba a la manzorga del cuerpu cola mandrecha y al contrariu y enantes de que’l malu disparare, ya-y había metío dos balazos nel corazón, depués, mientres soplaba el fumu que salía del cañón de les pistoles, dixo con voz fonda: “ya te lo avisara, santín. Entós entró pal salón y pidió un güisqui, como si nun pasare na”  o “el ganster taba cola moza nun garitu cuando llegó un sociu d’él que-y debía perres: ¿Tráesme lo que me debes?, Si, ye too pa ti, entós abrió un maletu que traía, pero, en verde les perres, sacó una metralleta y mató al pistoleru, lluego garró a la moza y marchó diciendo-y ya te dixera que esi home nun te convenía”.

Cantinflas y Charlot

De les de risa, que gustábennos muncho,  deprendíamos el acento mexicanu de Cantinflas, los sus andares col pantalón nel fondo’l culo y volvíamosnos llocos faciendo los esparabanes de Charlot y el so manexu del cayáu, nun yeren los únicos, que andaben tamién poles pantalles El Gordo y El Flacu, y Buster Keaton cola su cara de palu y Harold Lloyd colgau del reló, tamién se veíen les españolaes como La casa de la Troya, pero los que arrasaben yeren Charlot y Cantinflas.

Les histories de les pelicules contáes dexábennos aselaos, vivíamosles como si nos pasaren a nosotros mismos, porque nun tábemos tan refalfiaos de histories como tan los neños d’agora y ye que agora tienen les imáxenes pa ver mundu y d’aquella malapenes teníamos la pallabra.

© Milio´l del Nido

Memories d´unos nenos de Ciudá Naranco