Vecinos

En la nuesa cai, frente por frente de la nuesa casa, vivíen Sabino y Leonor. Sabino y Leonor nun teníen fíos, yeren de la parte de Campu Casu y nel barrio exercíen de señores. Sabino había tao d’emigrante por América y había vuelto con perres. La su casa, de planta y pisu, yera la meyor de tola redolada, na planta baxa taba el garaje y allí teníen una rubia, un coche-furgoneta muy elegante, con partes de la carrocería de maera noble, siempre mui llimpia, como todo na casa, que yera bono y de calidá. Pienso que, como nun teníen fíos, a mí teníenme un poco como adoptáu, pasaba munchu tiempu con ellos ¡Buenes llambionáes me preparaba Leonor! ¡Qué pastes, qué galletes! Llástima que cuando yo tenía seis años mercaron una casa, con un patio enorme, na Cai La Lila y anque me llevaron munches veces con ellos, ya nun yera lo mismo, quedábame a desmano y ellos fueron faciéndose mayores, que ya lo yeren y poco a poco, como tanta otra xente, esmuciéronse. 

Les veceres de Doña Luz

Na casa pegada pa la parte d’abaxo de Sabino y Leonor, vivía Doña Luz, agora pienso que debía ser una “madame” retirada. Na su casa vivíen realquiláes, de habitación con derecho a cocina que se dicía, varies muyeres que se dedicaben a la “vida alegre”. De neñu nun sabíes mui bien lo que queríen dicir los mayores con aquello de la vida alegre, pero saber, sabíeslo. Elles, na vecindá, teníen un comportamientu de lo más reserváo, nunca el menor escándalu dieron, yeren unes vecines tan formales como les demás. Ya mayoracu, con quince o dieciséis años, la primer vez que me atreví a entrar en unu de los bares de fulanes de la Cai Covadonga, hai que tener en cuenta que un rapaz naquellos tiempos, cuando llegaba a una edá, tenía que cumplir dellos rituales y unu yera entrar en un bar de putes, entré en mogollón, con otra media docena de guah.es del barrio, que tábemos toos experimentando eso de entamar a sentise paisanos. Según me arimo al mostrador, tou nerviosu,  lo primero que siento ye un allegre ¡Hola Nido! ¿Qué fais periquí? Sentime como en casa.

Los gatos del consumeru

Una de les pupiles de Doña Luz yera Maruja, que taba casada con un consumeru, un recaudador de los Usos y Consumos, que yera un impuestu que pagaben a la entrada de la ciudá los aldeanos que baxaben a vender los produztos de la su güerta, o la llechi, o los güevos, o un gochu o lo que fuere. Esti home yera lo más callao que vi na vida, nunca paraba nos chigres del barrio, nun falaba con naide, solu lu veíes fumando el su Farias, emboscáu detrás de los xeranios na ventana o cuando entraba o salía de la casa pa dir a trabayar. Llamábase Juan y tenía el pelo y el bigote blanquísimos… bueno el bigote debía ser blanquísimu, debía, porque lu tenía teñíu de rubiu pol tabaco. Andaba en moto con una chamarra de cuero negru y gafes escures que-y daben la pinta de un piloto d’aviación inglés disfrazáu d’alemán de les SS. 

Un bon día pasaba por delantre d’él, que taba a la ventana de casa, cuando sentí que me chistaba, arimeme y díxome que me acercare, cuando llegué al pie de la so ventana, preguntome en voz baxa si quería un gatu, que lu había matao porque-y estropiaba les plantes del xardín. 
De aquella, ya mocetes, de vez en cuando preparábamos dalguna gatada, yeren les úniques fartures a les que llegábamos, por barates porque la carne salíanos gratis. Acepté-y el ofrecimientu y deseguía me sacó el gatu, muy bien empaquetáu nuna caxa cartón. Yo nunca enxamás hablare con él, ni con la su muyer de que comíamos gatos, ni de ninguna otra cuestión, enxamás cruzare pallabra con él. Bueno la verdá que tampoco me preocupó demasiáo saber cómo se había enterao de que yo de aquella yera gatívoru. El casu ye que el gatu taba bonísimu y depués d’aquel primeru tovía vinieron otros dos o tres. En total nun creo haber falao con aquel home más de venti pallabres, más o menos a cinco por gatu. 

El home de goma

Na casa de más p’abaxo, nel suétanu, taba la carbonería de Crispín y allí, nel pisu d’enriba, vivíen los Requejo, que teníen tres fíos del nuestru tiempu, Quique, que fue peluqueru munchos años na peluquería de Falín, na Cai Dotor Casal, frente’l Bar Venecia, onde poníen unos pinchos de Cabrales que quitaben el hipo.  Wifredo, “Vila”, que lluego trabayó na costrución y Pepín, el Merejo, que tenía una flesibilidá que nos dexaba a los demás rapazos cola boca abierta: garrábase les manes pola espalda y, sin soltales, yera capaz de pasales por riba la cabeza y poneles delante sin partise los brazos. Les veces que lo facía dexábanos aseláos, pero a él nun y gustaba muncho facelo, nun porque y costare, sinón porque y daba vergoña, si lo facía yera’l cambiu d’alguna cosa y siempres a regañadientes. Facía tamién la rana, agachábase y sacaba les rodiyes por delantre la cabeza, como si tuviere unes pates descomunales y daba unos blincos que talamente paecía el batraciu. Yera un home de goma.

Les vigues bocabaxu

Na casa apegada a la nuestra pa la parte d’arriba vivíen “les de al lao”. Les de al lao, María, Amparo y Rita yeren tres hermanes, solteres les tres, fíes de un empleáu de la RENFE que yera del pueblu de Payares, trabayaben sirviendo en cases de señoritos y dalguna vez llevaben a dalgun neñu, fiu de los señoritos, que yeren los amos de los famosos Almacenes Botas con elles, sacábenlos al patio de delante pa que xugaren con nosotros, pero yeren demasiáo finos, taben atontolinaos, nun valíen pa emporcase como los demás, tiraos pol suelu colos banzones o les chapes ¡Menudos aburríos! 

Al padre de les de “al lao” conocílu ya muy vieyín, yera pequeñucu, pero cabía-y tanta mala llechi como si midiere dos metros. Una vez que habíen comprao en casa unes travieses de la RENFE, pa cerrar un cachu del patio, pa les famoses pites de Prat del mio tiu Chichi, ficieron, entre mio tíu y mio güelu, los cinco o seis pozos que facíen falta pa espetales y que quedaren firmes pa aguantar l’alambrada que cerraría les pites, cuando entamaron a llevantales, siéntese la voz del payariegu, tou enfadáu 

.-   ¡Que diaños facéis! ¡Pará-y! ¡Pará-y! 

.-  ¿Qué pasa? 

.-  ¡Nun lo veis, faltosos! ¡Tais plantando les travieses cabeza abaxu!

Y dicíalo encendíu el condenáu. Cómo yera pa saber que taben cabeza arriba o cabeza abaxo, unes travieses vieyes de maera, enllenes de la grasa y el fumu de los trenes nunca fuimos a comprendelo. Pero cambiales de postura, hubo que cambiales ¡Cualquiera aguantaba al vieyu! 

Rafael y Rafaela

Na casa de más p’arriba, nel 40, nel primero a la mandrecha, vivíen Rafael y Rafaela, que yeren  los pas de Maruja y Pili. Maruja casose con mio tiu Pedro, Chichi pa toos, que yera el de les pites de Prat. Rafael y Rafaela yeren castellanos, cazurros que dicíamos, ella de Paredes de Nava, en Palencia y él, madrilanu. Rafael trabayaba nel periódicu Región, manexaba la rotativa, la máquina que imprimía los periódicos, yera un home calláu, siempre cola so boina, a mí paecíame un buenazu, Rafaela yera lo que llamábemos una cazurra, una de eses castellanes, seques y series que metíen miéu. Maruja, la fía mayor, que lluego fue mio tia, taba empleada na alministración de La Fueya del Llunes, el periódicu que sustituyía a toos los otros esi día de la selmana. La hermana, Pili, tenía fama de celebrín, llegó a profesora na Universidá, pero la probe tuvo mala suerte, murió moza, paezme que de un tumor nel celebru. Toos ellos formaben un grupu mui formal, poco acordies col furrular más anárquicu de la xeneralidá del barrio. 

El forofu

Na misma casa, nel pisu d’enfrente, taba asitiáu Claudio Miranda cola so muyer Trini y familia. Claudio yera revisor de la RENFE y un forofu del Uviéu que metía miéu. Mio Pa tenía muncha amistá con él, pola forofada uvieísta. Dalguna vez tiénenme llevao con ellos al partido a Buenavista. De lo que más m’alcuerdo d’aquellos partidos ye del emblema de Auxilio Social, que yera obligatorio mercar pa entrar al campo. El emblema yera un escudu de cartón que representaba el pabellón de dalguna provincia española y había que colgalu nel oxal de la solapa de la chaqueta, que de aquella tol mundu andaba d’americana cuando se diba al partido, que yera un aztu social onde predominaba la elegancia, como tol mundo sabe. El emblema yera una especie de impuestu que había que pagar pa aidar a les persones más desfavorecíes, como llamaben d’aquella a los probes, porque sonaba más fino, Cómo llegaben les perres de los emblemas a los probes, o a qué probes llegaben les perres de los emblemas, yera un misterio y nun yeren aquellos buenos tiempos pa andar investigando misterios.

De llocos y lloqueros 

Con Claudio y la su familia vivía Jesusa, que me paez que yera cuñada d’èl, hermana de Trini y que trabayaba na Cadellada, el manicomio uvieín. A mi impresionábame muncho vela a veces, que andaba con un güeyu moráu o dalgún cardenal espardíu pol cuerpu. Polo visto, los estragos yeren causaos polos porrazos que llevaba cuando teníen que reducir a dalgunu de los probes llocos ingresaos y que nes condiciones que taben, masificáos, un montón d’ellos zarraos na misma sala, delles veces armaben griesca. Merecíen llástima los llocos y los lloqueros. Cuando se montaba alguna, allí había lleña pa toos. 

Peña Azul de Xixón

Depués d’unos años, Claudio marchó a vivir pa Xixón, que por razones del trabayu, venía-y muncho meyor, porque de allí salíen y allí morríen los trenes nos que él intervenía, que esi sería el trabayu de un interventor-revisor, digo yo.

Allí, na capital de la Costa Verde, fundó la Peña Azul Xixón, de la que fue presidente hasta que morrió el probe. Facía falta cuayu pa fundar una peña del Uviéu en Xixón nàquellos tiempos y mantenela más de venti años dando guerra, como la mantuvo el buenu de  Claudio.

Faso, la muyer y los fios

Na misma casa vivíen Faso y la su muyer Oliva, con los sos fíos Manolo y Paco. Manolo casose pronto y marchó del barrio. Años depués de marchar del barrio coincidí con él nunes fiestes de San Roque, en San Cloyo, había venío de vacaciones a pasar unos díes colos pas y xuntámonos nes fiestes sancloyines, yo andaba medio enredáu con una moza de Villamar que solo me dexaba acompañala hasta onde empezaba el ramal de la carretera pal su pueblu, nun había forma de que me dexase dir con ella más p’allá, hasta que me enteré que yera porque baxaba hasta allí de madreñes, que la caleya tenía munchu barru y nun quería de ninguna forma que la viera cambiase los zapatos poles madreñes, que yo yera un rapaz finu, d’Uviéu y a ella daba-y vergoña que la viera de madreñes, así que dexaba les madreñes guardáes nel portal de la primer casa del ramal, onde se acababa lo asfalcáo y allí camudábales polos zapatinos de presumir. 

Cuando dexé a la rapaza, nel entamu la desviación pal su pueblu, taba esperándome Manolo, pa volver andando hasta’l barrio, que ya nun había autobús a aquelles hores y tocome llevalu hasta casa, porque había agarrao el probe un  enfile de munchu cuidao. Debimos echar tres o cuatro hores pa facer los seis o siete  kilómetros que nos separtaben de casa ¡un martiriu!

Paco, el hermanu, yera pa toos Paco el Cabezu, tenía una tiesta de proporciones considerables y un poco deforme, faltaba-y un fervorín, así como media garcillaína, aprendió el oficiu de zapateru y anque nun yera mui bonu cola lezna y too aquello, más o menos defendíase.

El padre, Faso, pa mi que’l diminutivu venía-y de Bonifacio, yera  bastante mayor, paezme que tamién bebía enforma, taba retiráu y yera natural de Candás, anque llevaba tola vida viviendo na capital, pienso que había trabayao nos carrosferriles.

Don sin Din ...

Tamién nel númberu cuarenta vivíen Enrique y Eulalia, nun teníen fios, él yera ferroviariu, maquinista en los Económicos y un mal díi, en un acidente, la máquina segó-y una pierna por baxo la rodiya. Retiráronlu con una paga mui pequeña que nun debía dar pa muncho, completaben los ingresos familiares llenando bolses de manzanilla y sobres de azafrán y coses así pa la tienda de La Favorita del Fontán y pa la farmacia de Dn. Manuel Estrada, en la Cai Xeneral Elorza. 

Enrique yera un home seriu y formal, taba gordu pa lo que se llevaba d’aquella, que los gordos yeren una especie escasa, vese que por culpa de la pata que-y faltaba movíase poco, y llucía-y más lo que comía. Cuando tenía que da-y dalgún recao de la farmacia o de la tienda, que lu llamaben al nuestru teléfono, que yera el de serviciu nel barrio, los de casa siempre me encamentaben que lu llamara Don Enrique, facíalo así y él siempre me contestaba: don sin din, mis coyones en latín. Y esa ye la única mala pallabra qu’enxamás y sentí dicir.

Les Carroces

P’arriba de la casa’l 40 taba lo de Julian Pérez, Petranova. Petranova tenía una empresuca que se dedicaba a la escayola, trabayaben allí ocho o diez persones y Julian, el amu, yera un artista. Cuando llegaben les fiestes de San Mateo, el Día de América n’Asturies, el día les carroces, del taller de Petranova salía siempres una carroza que a nosotros paecíanos una maravía, lo mismo yera un horru que un barcu veleru, una vara yerba o una panoyona maíz, un caballín de mar o un caballín del Diañu. Baxábamos a ver el desfile solo por comparar la “nuestra carroza” coles demás y la verdá que casi siempre nos paecía la más guapa, la que más aplaudía la xente. Sobre too, la rivalidá manteníase cola carroza de Colominas, otru taller escayolista, que taba tamién nel barrio, na cai Antonio Rodríguez, pero que normalmente nun-y llegaba  ni a los todiellos.

Los fios del Capitán

Nun m’alcuerdo si se llamaba prolongación de Julian Rodríguez lo que agora ye Vital Aza, paezme que sí. Allí taba y ta, la casa del Capitán Arturo, un xaletón grande con bastante tarrén alredeor, el Capitán yera un home falaor, amigu de mi güelu y cuando díbemos a llindiar les vaques siempre se paraba a falar con nosotros, alcuérdome del enorme mapa d’España en relieve que tenía tras del portón de lo que quiciás fuera pensao pa garaje, pero paezme que nun había coche. Contábenme los fios que aprofitaba’l mapa pa preguntayos qué ríos se cruciaben saliendo de Madríz poles carreteres radiales que xuníen la capital con tolos puntos cardinales de la península. Tenía un montón de fíos, ocho o nueve y a los chavales gustábayos el fúbol y munchos sábados, xuntábamonos con ellos nos patios del Loyola pa echar partidos. Pesie a que na carrera militar, mientras vivió nel barrio fue ascendiendo, pa los vecinos siempre siguió siendo El Capitán, que yera la graduación que tenía al llegar al barrio.

Poco a poco, na misma cai, fueron faciéndose más xalés. Unu de los primeros fue’l de Don Gaspar, el profe del Loyola, que tuvo dos fios Lalo y Pablo, tamién aficionaos a los partidos fuboleros de los sábados nel Loyola, 

Don Gaspar, Don Gaspi nunca me tocó de profesor, el recuerdo que guardo d'él ye más de sentilu cantar na misa de los domingos, que yera'l que llevaba los cancios cola su voz bien modulá. 
Na'cera de don Gaspar costruyeron tamién otra riestra xalés, unu d’ellos foi el de  Mino, que yera empleau de la RENFE, mui devotu, mui d’ilesia, al que tengo visto nes procesiones del Corpus y de Selmana Santa con un estandarte de dalguna cofradía y a mí impresionábame muncho col su bigote finu y el su porte marcial. 

Taba tamien na misma acera Armando Guerra como él me tien dicho que se llamaba, anque en realidá apellidábase Espiniella, tenía un taller de coches na Tenderina y tenía tres hermanes, altes y flaques, series como escobes, que trabayaben na Telefónica. Pámeque yeren cazurros.

Pola misma acera vivió unos cuantos años Paco del Capradoiro, nativu de Serantes como mio güelu, Paco trabayaba como recepcionista nel Hotel España. Siguía la casa onde taba con unos familiares, Estrada, que yera compañeru miu nel Loyola y apegao tenía la su vivienda Manolo Carrera, el mecánicu, del que ya tengo falao.  

El Chiquitín

Na parte llana de la nuestra cai vivía Ausejo, El Chiquitín. El Chiquitín yera viaxante de comercio y el nomatu venía-y de la estatura. El Chiquitín yera el paisano más altu del barrio con muncho. Debía andar por el metro noventa o dalgo p’arriba entovía. Yera un home mui bromista, alcuérdome de una vez que na nuesa tienda, había un sacu zucre abiertu, de aquella, el zucre venía en sacos de tela blancos, mui finos, de 50 kgs. vendíase detallándolo al pesu, el sacu abríase con munchu pricuru, enrollando los bordes, quedaba una circunferencia blanquísima de zucre a la vista. De repente el Chiquitín entamó a dar voces que qué gochada yera aquello y dáben-y unes arcáes que paecía que de les voltures diba echar les coráes pola boca. Quedó tol mundu aparáu, mirándolu, él, entre esparabanes, entamó a señalar pal sacu’l zucre y allí, en medio la blancura, había una cagada como de perru grande o de paisano. Los de la casa que tábemos presentes quedamos fríos, balbuciando disculpes sin explícanos como podía haber pasáo aquello, hasta que Ausejo, arreventando de risa, garró la cagada cola mano. Yera una imitación de goma o bakelita, que plástico d’aquella había poco. El mui bromista habíalo colocao, mui arteramente sin que lu vieren. 

Vienme a la memoria cuando facía como que se enfadaba y espurriéndose en puntilles dicía mui seriu: Quiera dios que llueva hasta que me llegue l’augua a mí por aquí. Y señalaba cola mano xusto debaxo la boca. Quedaba tol mundu camentando como taríamos los demás si al Chiquitín y llegaba el agua hasta la boca ¡Probes!

L´Alcalde Barrio

Na casa de al lao, entre la de Dn Constantino Cabal y la del Chiquitín vivía el alcalde de barrio, Julio Siñeríz cola su familia. En casa, nun sé porqué, nun yeren los Siñeríz, yeren Los Triviño, que yera’l apellíu de la muyer. Teníen unos cuantos fíos, Julio, el mayor y Manolo y Ceferino amás de algunes neñes. Julio trabayaba na oficina téunica onde daben los permisos de obres del ayuntamiento, oficiu y llugar en el que lu siguieron los fíos. Manolo y Ceferino fueron árbitros de balonmano y cuando se formó el Balonmano Ciudá Naranco dalgún tratu hubo con ellos, que anque a nosotros nun nos pitaben casi nunca, solo podíen facelo en partidos amistosos, porque yeren de la misma ciudá, dalgún enguedellu colos sus compañeros colexaos nos tienen arreglao.

Garaizabal

Enfrente del Chiquitín y los Triviño, vivíen y unu de los fíos, Fernando, allí sigue viviendo, los Garaizabal, pámeque yeren cuatro dos hermanes y dos hermanos, Carlos y Fernando, de les hermanes no me vien el nome agora, los pas yeren Manolín Vázquez, que trabayaba na RENFE y Mary Garaizabal, que tenía un hermanu, Marcelino, que vivía con ellos. Marcelino, nos años cincuenta emigró pa L'Arxentina y nunca más volvió, una vez que tuve en Buenos Aires, nel local social que tien el Centro Asturiano a la vera del Rio La Plata, topeme con un paisanu asturianu, que me entrugó de onde yera, díxe-y que d'Uviéu y el contestome que él tamién, quedeme parau, miré pa él y díxe-y, tú llámeste Marcelino Garaizabal. Quedó a colores. Bueno, quedó no, quedamos, porque'l primer sorprendíu fui yo, ¡facía cuarenta y pico años que nun lu veía! el había colao p'allá cuando yo tenía diez años, o por ahí, yera muy amigu de mio tiu Pedro, el de les pites de Prat y vínoseme  a la tiesta el nome sin pensalo. A la vuelta pa Uviéu contéilo a los sus sobrinos, colos que guardo buena amistá. Carlos, el mayor de los rapazos, trabaya de revisor na RENFE y toos ellos son una xente de lo meyor

Los Tolivia

Al pie de la imprenta Hifer, la de Higinio, vivía la familia de Dn. Luis Tolivia que proveníen de Sevares, en Piloña.  Don Luís, siempre fue Don Luis, anque nun yera un home de carrera. Trabayaba d’encargáu nun almacén d’aceites que taba na Cai Almacenes Industriales, pámeque se llamaba Aceites Oleum, yera altu y flacu y mui seriu, tola familia yeren mui de mises y rosarios. La fía casose con un mozu que yera policía secreta lo que siempre daba un puntu como de misterio y medrana. El fíu, Toto, que debía ser economista, anduvo unos años poles amériques de direutivu de dalguna empresa multinacional, cuando tornó p’acá entró nel gobiernu rexonal de direutor xeneral de finances o dalgo paecío, pero tuvo algún follón, paezme que de perres, y al poco desapaeció de la escena. Na su casa tuvo unos años un pariente qu'estudiaba nel Loyola, Javier Escobio, que agora ye secretariu de ACAS, la asociación que curia de los asturcones del Sueve y que me llevó de invitau delles vegaes a la Mayá d'Espineres, a la Fiesta l’Asturcón.

Neptuno

En un xalé apegau a la Granja Iris vivía Neptuno, puede que tuviera nome propiu, pero paezme que yo nunca sentí cual fuera esi nome, col del dios del mar sobrába-y. 

Neptuno tenía un comercio de venta de Paragües por onde ficieron lluego La Jirafa, el gran rascacielos uvieín, más que polos paragües yo conocíalu pola su afición a los coches, que siempre andaba negociando con ellos. Compraba coches esgonciaos, reparaba por ellos y vendíalos, téngolu visto un día que andaba componiendo el filtru d’aire de unu, con una lata de bonito en escabeche, de les grandes, de un kilo y pico, soldando por ella pa meter dientro’l filtro.

Alcuérdome de una historia que contaba de una de les sus chapuces cola mecánica, había vendío un coche a un paisanu de Sotu’l Barcu, quedó en lleváilu cuando terminara de reparalu, cuando lu fue a poner en marcha, arrancó pa’llá, pero al subir el Alto’l Pravianu, xusto enantes de llegar a Sotu, el coche averiose, por más que trastió por él, nun fue pa arrancalu, entós faló con un paisanu de una casería averada pa que-y subiera’l coche colos güés hasta lo alto, entrugó la hora a la que pasaba’l ALSA pol pueblu y cuando faltaben venti minutos pa la hora, dexó cayer el coche, cuestabaxu y aparcolu nel medio la plaza, fue a la casa’l paisano y pidió-y les perres, porque tenía que garrar el autobús pa tornar pa Uviéu. El paisanu quería probar el coche, pero Neptuno, muy convencíu, díxo-y, ¡que más prueba quiés que me truxo hasta equí!  

Así que garró les perres y salió escopetau. Contábalo dempués nel garaje de Manolo Carreras muertu risa. “nun creais que fue broma la cosa, dicía, que llegó un día onde la tienda y tuve que meteme embaxo’l mostraor, que traía una cara mala llechi que metía miéu” y seguía riéndose’l condenau.   

Al probe Neptuno matolu un camión que se averió baxando’l Alto La Mirando y garrolu de frente, dexándolu nel sitiu. Coses del destín de cadaunu.              

Fausto y Rosina

La Granja Iris, aquella istalación industrial que pudo ser y nun fue, daba, pola parte d’atrás, pa la Prolongación de la cai Julián Rodríguez, pa esta cai quedaba un cachu prao y les espaldes de les costruciones de la Granja, que formaben una especie de güecos que paecíen como les puertes de entrada pa un almacen, teníen, esa especie de puertes, como un metro y un poco de fondo y un ancho como de tres metros cada güecu, lo que nun teníen yera puerta, taba solo el furacu y había como seis. En unu d’esos furacos inhóspitos que pa más, daben pal norte,  vivieron unos cuantos años, Fausto y Rosa, dos probes que debíen ser duros como peñes, porque aguantar los iviernos en aquelles condiciones tenía que ser duro de verdá. Teníen un perru al que llamaben Atila y que facía honor al nome, porque yera un bárbaru que mordía en sin avisar. Pienso yo que’l vino ayudaría pa resistir lo más prieto de los iviernos, porque a los dos yos gustaba el pimple, veíamoslos a veces subir la cai dando trombios de llau a llau de les aceres y nun solo porque tuvieren mal pavimentaes. Pámeque yeren apreciaos polos vecinos y cuéntenme que Fausto yera celosu y cuando s’enfilaba armaba-y la bronca a la muyer, que si había mirao p’aquel o p’aquel otru. Lo que son les coses del querer.

Coméntame Arturo el del Capitan, que yeren los clochards de Ciudá Naranco. Mira por onde, gracies a ellos, tábemos a l’altura de la Ville Lumiere. Y yo pensando que yéremos la cola’l mundu. 

Carreño

A la entrada pal barrio, por baxu’ puente de la RENFE,  na más pasar el puente, a la manzorga taba l’edificiu del Molino Viejo que llamaben, yo nun lu conocí como molín,  yera una casa grande de vecinos, pero el nome seguro que yera por algo, casi apegao taba el garaje Carreño y un poco pa tras el chaletón de Carreño. Lo que nos llamaba l’atención a los guah.es, yeren les piares de gochos de pata negra que llegaben de les deheses de Salamanca en la RENFE de vez en cuando y que los metíen nel garaje enantes de llevalos al mataderu. Tou un espetáculu ver la procesión de cincuenta o cien gochos, rodeaos por seis o siete paisanos que los diben llevando al pasu hasta’l garaje.

Carreño tenía dos fios, una pareja y el rapaz taba mancorniau de les pates y andaba siempre con muletes.

El padre, tengo sentío que había sio aprovisionaor de carne del Exércitu Nacional cuando la guerra y que de ahí y veníen los capitales. Polo oyío tenía autoridá pa decomisar animales polos pueblos y vese que dalgo de carne y quedaría peles uñes. Pero eses coses dicíense en voz baxa y vete tú a saber lo que había de verdá nel asuntu.

Los de Olimpia

Olimpia y Pachu teníen la tienda en la calle Antonio Rodríguez, Olimpia yera mui artera y tenía unes fíes que yeren heriedes del arte de la madre pa despachar nel ultramarinos que se dicía, paezme que yeren cinco neñes y dos neños, Esperanza, Geli, Mary, Primi, Mª Fernanda, Toni y José María, creo que nun me falta ningunu. De los guah.es Toni yera col que más aquel había, porque José María yera muncho más nuevu y casi ni lu tratamos.

El home, Pachu, yera mui calláu, mui fuín, tenía una motuca Iso, cola que diba tolos domingos al mercao a Grao pa trapichar coles muyeres de la plaza lo que lluego vendíen na tienda, venía cola motuca cargá de sacos y paquetes que nun se esplica unu como nun se mataba intentando guardar l’equilibriu.

De les fíes, Esperancina yera la mayor, gastaba gafes de culovasu y taba siempres na tienda, bueno, tras del mostrador topabes a cualquiera de la reciella fíos, el que nun solía despachar yera Pachu, que nun tenía arte pa tratar coles muyeres, col su calter secu y calláu. 

El mayor de los fios, Toni, de mayor tuvo perante unos años un Video Club, de la que se punxeren de moda, la tienda tuviéronla abierta hasta los años ochenta, habíen entrao na Cadena Spar, que fue la cabera boquiá de les tiendes de barrio pa intentar resistir la llegá de los supermercáos, pero, como toes, tuvieren que finar pesllándola. 

 © Milio´l del Nido

 Memories d´unos nenos de Ciudá Naranco