Los xuegos de los rapacinos

Los neños, a metanes del sieglu pasau, nun teníemos ningunu de los aparatos elleutrónicos de los que agora abunden, pero teníemos al cambiu munchísima más llibertá pa movenos de lo que lo pueden facer los neños d’agora. Un cambiu fundamental vieno por culpa de la abundancia de coches, lo que truxo consigo que un nenu nun puede andar sueltu pola cai así como así.

Cuando nun había coches, los crios, dende los tres o cuatro años, salíen a xugar delante casa colos otros neños, sin tener que llevar a un adultu pegau a la chepa como pasa nestos tiempos. Los xuegos veníen por temporáes: La queda, el piocampo, centinela alerta, mula, cuchiellu tisoria güeyu de güé, el esconderite, la peonza, les chapes, raya, les cuatro esquines, el cascayu, los carros de bolines, l’aru,  Roma, campos medios, el guá y por enriba de too el balón… cuando lu había. Les neñes poques veces xugaben mezclaes colos rapacinos, a lo meyor a la queda, a la pita ciega, al esconderite o el cascayu, pa elles reservábase la comba, el corro y sobre too, les muñeques.

Voi falavos d'ellos a poquitinos.

La Queda

La queda, pienso que munchos alcordaréisvos de cómo yera, había unu que “se quedaba”  en La Madre, que yera'l llugar onde entamaba'l xuegu y esi, salía corriendo detrás de los otros compañeros de xuegu, cuando tocaba a dalgunu dicía-y ¡queda!, entós el tocáu, si llegaba primero a La Madre, salvaba, si nun yera asina, tocába-y a él perseguir a los otros. Paezme que agora los críos xueguen a dalgo asemeyao  y que lo llamen piya-piya.

Cuchiellu, Tisoria, Güeyu de Güé

Pal Cuchiellu, tisoria, güeyu de güé, formábense dos equipos que solíen tener entre dos y seis xugaores cada unu y un nenu más que facía de madre. El que facía de madre sentábase enriba de un muru o llugar paecíu, firme, con la cabeza del primeru de unu de los equipos apoyada nel regazu y les cabeces de los compañeros metides entre les pates del que teníen delante, entós los del equipu contrariu saltaben p'enriba de los agachaos, con cuidao de nun cayer, porque si cayíen, si dalgunu tocaba’l suelu, teníen que ponese ellos embaxo. Cuando ya taben toos enriba los llombos de los contrarios, el primeru del equipo colocaba colos deos una de les figures del xuegu, una tisoria con dos deos en uve, un cuchiellu col índiz, o un güeyu de güé xuntando el índiz y el pulgar, a la vista de la madre y entrugaba ¿Cuchiellu, tisoria, güeyu de güé? Y unu de los d’embaxo dicía lo que-y paecía, si acertaba, mudaben de sitiu, pasaben los de enriba pa baxo y al revés, si nun acertaba volvíen a saltar enriba los mismos y entamaba otra vuelta. Yera un xuegu ya pa mozacos, poníase a prueba l’axilidá y la fuerza, porque los primeros en saltar teníen que blincar muncho pa dexar sitiu pa los compañeros que veníen detrás y había que disponer a los del equipo agacháu de forma que onde se calculare que diba a cayer el mayor pesu estuviere el más resistente, porque si se falsiaba, volvíen a saltar enriba los mismos.

La Peonza

La peonza pienso que toos la conoceréis, ye un trompu de maera con un ferrón na parte más afilá, alredeor d’él enróllase un cordel y llánzase con fuercia escontra’l suelu, al finar de tirálo recuéllese con arte el cordón, pa que de vueltes la peonza. Prestaba muncho, cuando salía bien, garrala na palma la mano mientres xiraba. Pero cuando prestaba de verdá yera cuando tirando la tu peonza partíes la del contrariu, la que ya taba baillando. Pa eso ya se xugaba con peonces arregláes, tuneáes diríase agora, a les que se yos cambiaba el ferrón normal que trayíen y poníaseyos unu más grande que llamábamos de “rosca y lanza”. Menudes lloreres dalgunes veces cuando de un ferronazu rompíen la tu peonza, que la queríes como si fuere d’oru. Cuando yeres tú el que rompíes la del otru, poníes cara como de date pena, pero por dientro tabes argullosu, mismamente  como el guerreru que matara al osu que menaciaba la tribu.

El Guá

El guá yera xuegu mui prazticáu polos neños, nun yera pa críes. En cualquier terrenu en sin yerba, lo más llimpio posible, facíase un furacu que yera el guá, cada xugaor tiraba un banzón intentando metelu  dientro’l furacu, el que quedaba más cerca, entamaba’l xuegu. Saliendo del guá tenía que dar col su banzón al banzón del contrariu, marcando dende’l guá una cuarta, lluego xiraba la mano y apoyando la muñeca nel deu gordu de la mano cola que medía y col banzón entre los deos, tiraba contra el del contrariu. Podía facese de tres maneres, según les preferencies de cada unu, col banzón ente’l deu gordu y el indiz impulsando el banzón col indiz, col banzón colocáu entre el deu gordu y el corazón, emburriando col corazón o col banzón ente’l deu gordu y el indiz emburriando col gordu, si al tirar tocaba’l del contrariu dicíase: “Primeres”, lluego tenía que pegá-y otra vez y tenía que desplazar la pieza del contrariu polo menos que coyere un pie entre les dos, dicíase “pie”, lluego, si cabía el pie, tenía que pegá-y otra vez lo más fuerte que pudiere, pa mandalu bien lloñe, porque depués había que meter el banzón nel guá, si lu metíes, quedábeste col banzón del otru, pero si nun lo llograbes y el contrariu metía’l su banzón enantes que tú, yera él el que ganaba la tu pieza. El xuegu tenía delles complicaciones, xugábase con banzones, chines, aceros y mejicanos. Lo más corriente yeren los banzones, que yeren de barro cocíu y teníen el menor valor, comprábense baratinos y había munchos, les chines, que yeren de piedra pulío, podíen valer como cinco o seis banzones, los mejicanos yeren de cristal con bandes de collores variaos y podíen valer como una china, pero los bonos de verdá yeren los aceros, que nun yeren otro que les bolines de los rodamientos. Los banzones, les chines y los mejicanos vendíenlos nes tiendes y teníen un preciu determináu, pero los aceros había que conseguilos en dalgún taller mecánicu y eso facíalos de munchu valir y raros de conseguir. Too ello facía que el xuegu tuviere muncho de mercáo, porque anque les chines y los mejicanos, como los banzones, teníen un costu definíu nel comercio, lluego cada unu dábayos el valor que quería, porque unos gustaben más que otros y avezábeste a ellos y entós al entamar el xuegu había que aclarar el valor de lo que xugabes: el tu mejicano por ocho banzones, o esi acero por cuatro chines. Andábemos toos con unes bolses de tela que teníes qu’encargar que te les ficiera  to ma, o la to hermana o dalguna que supiere coser un poco, pa poder llevar tola colección pa defendete nel campu l’honor banzoneru.

La Mula

El xuegu la Mula desendolcábase con unu que se ponía dobláu pola cintura que facía de “mula” y los demás diben saltándolu, diciendo y faciendo una serie de figures hasta que dalgunu s’enquivocaba y tenía que ponese nel llugar del que taba faciendo de mula. La retafila entamaba: a la una pica la mula y el primeru que saltaba facíalo poniendo les manes en llombu de la mula, mientres col pie de la parte del culo del que taba agachau, dába-y un taconazu al saltar, los demás teníen que saltar faciendo lo mismo, la retafila yera siempre igual, pero les figures mudaben, podíen ser un taconazu o una palmada o pasando coles dos pates pol mismu llau, o teniendo que dar unos blincos a la pata coxa o… lo que se-y ocurriere al primeru, si dalgunu lo facía mal, tenía que ponese de mula. La retafila seguía: a les dos la gran coz, a les tres tres saltinos pegaré, a les cuatro blinco y salto, a las cinco salto y blinco…. Tenía al pie de venti o trenta variantes, pero poques veces se llegaba al final, porque siempre dalgunu s’enquivocaba y entamábase de nuevo.

Roma

A Roma xugábase cuando el suelu de los praos taba blandu pola lluvia, podíen xugar hasta cinco o seis, cada unu armáu con un palu afiláu. Marcábase un reondel onde tuviere la tierra un poco blanda, que se pudiere clavar el palu, pero que se aguantare tiesu cuando se clavaba. Sorteábase el orden de tiru y el que-y tocare primeru tiraba el palu de punta, tolo fuerte que podía pa que se espetare bien y que aguantare firme de pie, lluego, el siguiente, tiraba el su palu intentando baltar el del primeru y que se aguantare en pie el suyu y así sucesivamente hasta que dalgunu derribaba algun palu, si lu tiraba, agarraba el palu caidu y col suyu golpiábalu tolo fuerte que podía, pa mandalu cuanto más lloñe meyor, porque lluego tenía que espetar el su palu, tres veces seguíes, enantes de que volviere el del palu llanzáu y espetare el suyu, si lo conseguía quedaba fuera el que había cayío, si volvía enantes de les tres veces podía seguir xugando. Xugábase hasta que quedaba unu solu, que había ganao Roma. 

Tengo visto de poco p’acá una variante, el Lirio Lario, que paez se está imponiendo, na que  xueguen dos o más, cada unu tien dos palos, unu más piquiñín como de quince o venti centímetros, coles puntes afilaes, que coloca nun suelu lisu, con la punta alzada y col otru,la machorra, que ye como un tolete de guardia urbanu, col que da un golpe n’esa punta y cuando vuela, péga-y nel aire, cola intención de llevalu a un reondel marcau en suelu, van dando tolos xugaores por orden y el primeru que ye a meter el su palu nel reondel, gana.

El Pelotu

Al balón xugábase en cualquier parte, los sitios más aparentes yeren el Prao Villar, onde habíamos preparáo el llugar pa entrenar los saltos con Poladura y el Prao de los Soldáos, que taba al entamu de la Cai Antonio Rodríguez, agora Augusto Junquera, subiendo a la mandrecha, pero onde más se xugaba yera na misma cai. Con unes piedres o colos cabases del colexu o les chaquetes o les xersés, facíense unes porteríes y ya taba armáu un partido de alcantarilles, pero si nun había xente abondo pa organizar un partido xugábamos a “centros”, con unu de porteru y otru centrando como si sacare corners y los demás a rematar. Un sitiu mui aparente pa xugar yera nel cruce de Julián con Manuel Rodríguez, la portería formábenla los dos pláganos que señalaben l’acera. Tenía un problema, cuando salía dalgún remate demasio bien, rompíamos un cristal de casa de Machín, que tenía ventanes nel chaflán de la calle y ya teníamos la bronca armada, aparte de pagáilu había que aguantalu, que inda yera peor. Les dificultáes pa xugar dábenles la escasez de balones o pelotes, nun siempre había con qué xugar, por eso, el que ponía el pelotu tenía drechu a escoyer los compañeros y claro, siempre formaba el meyor equipu, colo que casi siempre ganaba ¡Les ventaxes del capitalista!

Les Chapes

Les chapes valíen pa facer unes carreres ciclistes de munchu cuidao. Aprovechando un cachu acera  que tuviere pavimentao, pintábase una carretera con un cachu escayola, la carretera, con un ancho aproximao de cinco o seis centímetros, tenía que dar vueltes sobre sí misma, con reviricoques, nos cruces poníase una cruz y aquello yera un pinchu, si la tu chapa cayía allí, teníes que volver a entamar dende la salida, si te salíes de la carreterina volvíes al sitiu dende onde tirares. Tamíen se podíen poner pinchos onde apeteciere. Ganaba el que primero llegare a la meta. Les chapes yeren les de les gasioses, había qu’escoyeles que tuvieren lo más lises posible, pa lo que había que abrir les botelles con cuidao pa    nun deformar la chapa, lluego metíes dientro la chapa la cara de dalgún fenómeno ciclista d’aquellos tiempos que salíen nos cromos, Bernardo Ruiz, Langarica, Bahamontes, Loroño, Poblet, Charly Gaul, Luisón Bobet, Coppi, Bartali… depués cortábase un cristal a la xusta medida pa que cubriere’l cromu y nos bordes, axustábase con masilla de la que usaba pa poner nos cristales de les ventanes, con too ello, pol pesu, la chapa yera más estable y calculábase meyor la fuerza pa poder avanzar en sin que se saliera de les rayes ni cayere nos pinchos, amás el pesu yera importante, porque una chapa lixera mandábenla fuera los contrarios con facilidá y por embargu, con ella nun yeres a puxar fuera la de los otros si yeren más pesáes, lo que pasaba, anque yos dieres, yera que la chapa liviana rebotaba y en verde echar fuera la del contariu, la que se salía yera la tuya. Lo que precisaba de munchu cuidao yera preparar el cristal, pa conseguir reondealu había que iguar un alambre, doblándolu sobre si mismu, dexando un furaquín nel doblez por onde se metía la esquina del cristal y faciendo un poco fuerza, rompíes-gastabes la esquina. Así, a pocos y a pocos, hasta que quedaba el cristal con un reondel perfeutu que axustare a la chapa. Tamién se redondiaben los cristales con dos regodones bien pulíos, de los que se topen nos ríos y con ellos díbase machucando’l borde del cristal hasta algamar les medíes de la chapa.

El Cascayu

Al Cascayu xugábase onde hubiere un espaciu llanu y a poder ser, cementáu, si yera así, pintábase con un cachu escayola lo que yera’l cascayu, que venía a ser un rectángulu dividíu en cuatro cachos, con otru espacio, más pequeñu y tamién rectangular delantre, que se marcaba col númberu un, los otros cuatro espacios marcábense con númberos consecutivos, entamando pol más cercanu a la manzorga, que yera’l 2, enriba d’esti, tamién a la manzorga, taba el tres, el cuatro yera el más alloñáu a la mandrecha, que tenía debaxo al cinco, que quedaba como el 2 apegáu al un y ya na parte fuera, por enriba, marcábase el seis. Xugábase tirando una piedra plana, la champla, entamando por el orden correlativu, si al tirala, la champla te cayía bien, sin tocar raya ni salise del cuadru al que la dirixíes, teníes que saltar por enriba del cuadru al que tirares pisando los otros númberos a la patacoxa y en sin tocar les rayes, si tocabes, o la champla se te salía, perdíes el turnu. El cascayu yera de los pocos xuegos nos que podíamos xugar xuntos neños y neñes, anque pienso que yera un poco más de neñes. Podía marcase pa xugar tamién en tierra en sin cementar, pero entós la champla corría menos, yera más facil acertar y resultaba más aburrío.

El Aru

Al Aroxu gábamos faciendo rodar un aro con una gancheta, el aro tenía que tener alredeor de treinta o cuarenta centímetros de diámetro y la gancheta, que yera un alambrón con una especie de u na punta y que yera colo que se puxaba el invento, pa bien ser facíase d’alcuerdu cola estatura del pilotu. Yera mui importante que guardare bien l’equilibriu, que nun t’anduviere cayendo y nes cuestes abaxo, pa que nun se t’escapare había que meter la gancheta por dientro l’aru, pa que ficiere de freno. Facíamos carreres que delles veces nos llevaben hasta’l Loyola y volver o de un par de vueltes a la manzana, o cualquier otru recorríu marcáu. Pa conseguir los aros, el que tenía un amigu que trabayare n’una ferrería  encargábalu allí, otros arreglábense cola llanta d’una rueda de bicicleta, quitándo-y los radios y dalgunu tien aprovecháo el reborde de un balde vieyu, de los de llevar la ropa a llavar. Valíen toos y con toos prestaba un montón.

Estos yeren dalgunos de los xuegos más comunes, pero a los neños d’aquella, como nun teníamos coses, sobrábanos la imaxinación, así que se xugaba a cualquier cosa, una podía ser a facer de aventures de les películes que veíamos, a espíes, a descubriores, a piratas, a indios y vaqueros…

Les sigles

Una cosa que nos divertía enforma yera xugar coles pallabres y buscar significáos inventaos a los nomes comunes que tol mundiu conocía, pero que col xuegu, garraben otru significáu distintu, asina el Cine Aramo ¿Alcordáisvos que taba na Cai Uría?, pues eso, el Aramo, que pienso bautizaríen asina en honor del dios celta, o del monte que xebra les cuenques del Caudal y el Trubia, pasaba a ser ARAMO, les sigles de: Aquí Robamos A Medio Oviedo. Los autocares de los ALSA, que yeren Autos Luarca Sociedad Anónima, quedaron en Autocares Ladrones Sacaperres Amontones. Curioso yera también lo que la inventiva popular esbilló de la moto VESPA, que pasó a ser Vosotros Españoles Seréis Pronto Americanos y tovía, dándo-i la vuelta, Americanos Pronto Será España Vuestra. Quédame pa finar la SEAT, que ya se me escaeciera y que me refresca na memoria el mí bon amigu Viti Vázquez y que yera: Siempre Estoy Apretando Tornillos.

De xuro que había munches más, si a dalgunu de vosotros vos vienen otres a la tiesta, prestaríame que me les ficiéreis llegar, pa que esti requexín de la memoria siguiere medrando, que, polo menos a mí, tráime un sonrrisu a la cara.

Llégame al traviés de Juanjo Arrojo, el perconocíu fotógrafu, apoyáu nel Feisbu, otra definición de la palabra CELTAS, cola semeya de la cajetilla del tabaco al llau, n’aquellos años de mediaos del sieglu XX, cuando naide soñaba ni con autonomíes, ni nacionalismos ni na paecío dicíase: Celtas  Españoles, Libertá, Tenemos Ayuda Soviética. ¡Dalgunu  s’alcuerda d’ello? ¿A que nun ta mal, eh?

© Milio´l del Nido
Memories d´unos nenos de Ciudá Naranco