Xente del barrio

Casi enfrente del taller del Ganso, na Colonia Astur, vivíen Fernando y Juan Lorenzo, que yeren fíos de un empleau de La Voz de Asturies, yeren de Grao y pronto llamaron l’atención porque yeren bastante singulares. Juanín yera muy guapu, roxu, de faciones correches y muy paecíu a un artista de Jólivu, tan paecíu que nadie lu llamaba Juanín, yera pa toos James Dean, el hermanu mayor, Fernando, yera altu, flacu y fimu estilista futboleru.

Entre los que parábemos na zapatería del Puchi organizamos un equipu de futbol sala, el Zapaterías Figaredo, que asina lu bautizamos y apuntámonos a un campeonato que se disputaba na Felguera, Fernando yera’l meyor, pero cansaba a los tres minutos d’entamar a xugar, pero eso sí, nos tres minutos que xugaba, metía polo menos un gol, así que un gol o dos al entamar y otru depués del descanso, yeren dos o tres goles que los demás teníamos que facer valer peliando como perros, porque Fernando sentábase porque queda afogau, en sin respiración y por otra parte anque se permitíen cambios, nosotros solo díbemos los cinco, sin posibilidaes de recambiu, casi siempre nos llevaba mio padre nel su Renol cuatro  cuatro, así que nun había capacidá física pa llevar más xente. Pues con eses penuries, fuimos pasando eliminatories y nun ganamos el campeonato, porque la organización, cuando llegamos a semifinales, nun nos avisó del día ni la hora del partido y elimináronnos por incomparecencia y foi asina como perdimos les posibilidaes d’algamar la gloria futbolera.

El coche San Fernando

Dalgunes veces mio padre nun taba pa llevanos, porque viaxaba con les representaciones que llevaba y nesos casos, teníamos que dir nel autobús del Carbonero, pero eses veces, cuando acababa el partido, ya había terminao el horario los autobuses y un par de veces tuvimos que volver andando dende La Felguera, nel coche de San Fernando y esa yera otra. La carretera nun taba iluminada, coches había pocos y anque facíamos auto stop, nun aparaben nin llocos al ver aquella recua de mozos solos na mitá la nueche. Veníamos toos charrando de les coses del partido y poco, a poco, Fernando diba quedando retrasau, nun yera a seguinos el pasu ¡hasta qu’entamaba a lladrar dalgún perru de les cases que daben a la carretera! Entós Fernando salía disparau y metíase nel medio la recua hasta dexar atrás el pelligru, amiguinos, ye la fuercia que da’l miéu.

Fernando acabó siendo Fernando el del Paraguas, porque abrió, allá pa finar los setenta, na plaza’l Paragües, el primer Pub de Uviéu, que tuvo una repercusión enorme, onde paraba la flor y nata la inteleztualidá uvieína y foriata que pasaba pola ciudá, de Ángel González a Bryce Echenique, pasando polos catalanes de la Nova Cançó y acabando por los deportistas famosos, como el Errandonea del que faláramos enantes. Allí trabayé con él perante un par de años, guapes noches se tienen pasao ne Paragües.

Xente del barrio

Apegao al Prao Villar vivía “El Rango”, la su casa yera un híbridu de xalé y casería, porque cola fechura de un xalé teníen vaques y dedicábense a l’agricultura. El Rango ganara el alcuñu porque yera un poco contrefechu, algún problema nes piernes o na coluna facía que al caminar fuere un poco como dando golpes de cadera que facíen que’l pechu se-y llevantare como con chulería. Tenía un porte de categoría, de noble rango.

Cerca de Casa Olimpia, na Cai Antonio Rodríguez, vivía Jandrín. Jandrín yera un gallu. Jandrín, con trece o catorce años, andaba siempres en mangues de camisa, fuere iviernu o branu, coles mangues arremangáes y la pechera desabotoná hasta l’embiligu. Tiesu, enchipáu, Jandrín comía’l mundu. Anduvo una temporaína contando que quería marchar pa Nueva Yor, que cualquier día colaba. Nun callaba, taba tol dia retolicando conque diba dir pa los Estaos Xuníos. La verdá ye que nun-y facíamos ni puñeteru casu… y un bon día, esapaeció. Pasó una selmana sin tener noticía dalguna d’él. Nun se quien comentó que-y había dicho que arrancaba p’América. Toos pensamos que nos anduviéremos riendo d’él, sin facé.y casu y mira por onde, el rapaz diba en serio. Como a la selmana re-apaeció Jandrín. Trúxolu la Guardia Civil, que lu topara al debalu pol Alto la Espina. Lo que nunca supiemos fue quien-y contara a Jandrín que’l camín pa Nueva Yor pasaba pola Espina.

Pepe Luis y Caito

Un poco p’abaxo de Jandrín vivíen Caito Gutierrez Álvarez y la su familia, Ricardo y Valentina, los pas y Tinina la hermana, que se casó con Félix “El Gramolu”, a Félix llamábenlu así porque nun daba callao, facía él solu más bulla que los altavoces de les romeríes que ponía la empresa del Gramolu que yera la que sonorizaba toles fiestes de barrio allá pola mitá del sieglu venti n’Uviéu. Félix xugaba al fúbol y amás de xugar los partidos, los compañeros marmuriaben que, de pasu, radiábalos, siempre dicía él mismu que si-y cortaben la llengua, siguiría falando col tucu.

Ricardo y Valentina yeren veníos de la provincia de Lleón, Ricardo trabayaba en Ortopedia Uría y yera, como suelen ser munchos lleoneses, seriu y secu por fuera, pero tenía un coral d’oru. Valentina yera cocinera de les de categoría y bien de caracoles tengo xintao guisaos por ella y tovía guardo el tastu los famosos caracoles nel paladar. Caito bailló comigo nel grupu baile de la S. F. y más tarde nos “Urogayos” y ye pa mi como un hermanu más. Milenta batalles nos tocó llidiar xuntos. 

La otra pata pal tayuelu, con Caito y comigo, ocupábala Pepe Luís Suarez Tomé, xuntos entramos nel grupu de baille y más que xuntos, insepartables fuimos n’aquellos años mozos. Xuntos baillábamos y xuntos echamos moza y cortexamos, casi a la misma vez nos tocó dir pa la mili y casi al mismu tiempu nos casamos. Formamos una piña que solo el pasu los años fue a dir separtándonos no de tar xuntos físicamente, pero non no de ser amigos hasta agora mismo anque ya nun te Caito ente nos.  Pepe Luís vivía na misma casa de Chelo y La Nena, na esquina de Antonio Rodríguez con Aniceto Rodríguez, Pepe Luís yera fíu de Pepe y Ceferina, Pepe, pintor, yera carballón polos cuatro costaos y taba casáu con Ceferina que yera de la parte de Lleón.

Los guateques

El padre de Pepe Luis, Pepe,  yera pintor y escayoleru y tenía al pie de la su casa un almacén onde guardaba los materiales del su trabayu, escaleres, botes, broches, pinceles, trapos… la de coyer y dalguna vez convencíamoslu pa que nos dexare’l llocal y allí organizábemos guateques cola mor de ligar algo, que taba la cosa mui fastidiá. Había que trabayar enforma p’adecentar un poco el llugar, poner lluces de collorinos, (nun demasiáes porque pa los enamoráos ye bona la escuridá), que diz el cantar y había que buscar un tocata y discos, sobre too de  “lo lento” y preparar el Cap, que yera una especie de beberciu que facíamos colo que topábamos, coñá, ron, xinebra y sobre too gaseosa de naranxa, depués invitábamos a xente, les moces gratis, los mozos nun me alcuerdo cuanto, pero algo pagaben y anque fuere el sitiu, el beberciu y la música, lo más cutre del mundu, el casu ye que nun s’entraba de la xente que se xuntaba, pero ye que d’aquella la ufierta de ociu nun yera nin la solombra de lo que los mozos tienen agora y poder tar xuntos, mozos y moces, sin los mayores gusmiando por cerca, nun yera cosa que se pudiere facer tolos dís.

Na misma casa que Pepe Luís vivíen Paco y Raquel, nun teníen fíos, Paco trabayaba pa la diputación, tiénme contao que se criara nel Orfanato, nun conociera a los sos pas, y cuando llegó a los catorce años, colocáronlu nel almacén de materiales que la Diputación tenía nel barrio Los Económicos. Al poco d’entamar a trabayar morrió la madre de un compañeru del trabayu y fueron los del almacén toos al entierru, cuando terminó’l funeral, na ilesia, al salir, la familia de la muerta colocose al llao de la puerta y la xente formó la fila pa dayos el pésame. Y Paco nun diba ser menos, él vió que tol mundo daba la mano y dicía unes pallabres, pero él nun sabía qué pallabres se dicíen, nunca en otra se viere, así que punxo la oreya y cuándo y llegó’l su turnu, dio la mano muy seriu y dixo tou convencíu: La campana l’Ayuntamientu. Que yera lo que y había paeció sentir que marmuriaba el que diba delantre. Nun taba mal pa un principiante.

El sereno

De la que yéramos neños, nel barrio había sereno, apenes m’alcuerdo del primeru que conocí, yera un paisanu mayor que me paez que malapenes podía col chuzu que arrastraba, pero cuando se retiró aquel home, entró nel puestu Arnaldo, un mozallón del Abedul, en Belmonte Miranda, un pueblu altu al que pa llegar a él, habíen fecho una carreteruca que daba miéu polos vericuetos polos que se empolingaba, con unos despeñaeros de munchu cuidáu. 

 Arnaldo yera muy bona persona, servicial y atentu, pero gustába-y el vino y cuando se enfilaba un poco, había que tener cuidao con él, porque-y gustaba imponer l’autoridá, bueno pámeque lo que-y gustaba yera engarrase, así que cuando volvíes pal barrio un poco tarde, al volver d’alguna romería o algo asina, teníes que tener cuidao, porque si taba un poco caliente, igual te solmenaba un par de chuzazos si te dormíes.

Cuando abrí el Nido en Coronel Bobes, ya habíen quitao el seviciu de serenos y Arnaldo taba recolocáu nel serviciu de limpieza, un día taba tomando un vasu nel chigre y coincidió que tenía arimau a la barra el muñecu del Mateín, el personax que dende aquella ye’l emblema de les fiestes uvieínes, habíenlu fecho entre la mi hermana Mary, Hugo O’Donnel y Ánxel Nava,

© Milio´l del Nido

Memories d´unos nenos de Ciudá Naranco